Ստամբուլի հզոր պայթյունի պատճառը ռումբն է եղել
ԵՐԵՎԱՆ, 1 ԴԵԿՏԵՄԲԵՐԻ, ԱՐՄԵՆՊՐԵՍ: Ստամբուլում որոտացած հզոր պայթյունի պատճառը հստակեցվել է. գործի է դրվել պայթուցիկ: Ինչպես հաղորդում է «Արմենպրես»-ը, թուրքական «Հուրիեթ» պարբերականին անվտանգության մարմիններից հասած տեղեկությունների համաձայն` մետրոյի Բայրամփաշա կայարանի մոտակայքում ռումբ է գործի դրվել: Պայթյունը լսվել է Ստամբուլի տարբեր թաղամասերում: Կայարանում գտնվող բոլոր մարդիկ տարհանվել են: Այդտեղ են ուղարկվել փրկարար և շտապօգնության մի քանի բրիգադներ:
Թուրքական NTV հեռուստաալիքը տեղեկացնում է, որ կատարվածի հետևանքով վիրավորվել է առնվազն 6 մարդ: Ավելի վաղ ՏԱՍՍ-ը հաղորդում էր մեկ զոհի մասին:
HaberTurk-ի տեղեկացմամբ` Բայրամփաշա կայարանի մոտակայքում գտնվող մեքենաները մեծապես վնասվել են:
Դեպքի այլ մանրամասները դեռևս հստակեցվում են:
Բաժանորդագրվեք մեր ալիքին Telegram-ում