ԵՐԵՎԱՆ, 28 ՆՈՅԵՄԲԵՐԻ, ԱՐՄԵՆՊՐԵՍ: Թուրք-սիրիական սահմանի վերահսկումն ու փակումն այլընտրանքային ուժերի կողմից «Իսլամական պետություն»-Թուրքիա փոխհարաբերությունների համար կարող է փակուղի դառնալ: «Արմենպրես»- ի հաղորդմամբ` նոյեմբերի 28-ին լրագրողների հետ հանդիպմանն այս մասին ասաց քաղաքագետ Ալեքսանդր Մարգարովը:

«Թուրք սիրիական սահմանի վերահսկումն ու ուժեղացումը վտանգ է ներկայացնում Թուրքիայի  համար, քանի որ Թուրքիան կորցնում է  իր ազդեցությունն ԻՊ-ի վրա և Թուրքիայից լրացուցիչ մարդկային ռեսուրսների փոխանցումը դեպի ԻՊ սահամանափակվում է»,- նշեց քաղաքագետը` հավելելով, որ սահմանների վերահսկումը տարբերակ է, որով կարելի է հասնել արևելյան տարածաշրջանում ԻՊ և Թուրքիայի սեփական գերակայության մասին պատկերացումների վերացմանը: Սահմանի հսկումն ու փակումն այլընտրանքային ուժերի կողմից շատ հնարավոր է որ արվի մոտակա ժամանակներում:

Անդրադառնալով ԻՊ-Թուրքիա փոխհարաբերություններին` Մարգարովը նշեց, որ ԻԼԻՊ-ի ֆինանսավորման աղբյուրներից 2-3-ի մեջ Թուրքիան ներգրաված է. ԻՊ-Թուրքիա փոխհարաբերություններում Թուրքիան հանդես է գալիս ԻՊ-ի հնարավոր հովանավորներից մեկը: 

«Թուրքիան ԻՊ-ի համար հանդես է գալիս ռազմավարական ճանապարհի գործընկերը,  ուղղությունը, որն օգտագործվում է ԻՊ-ի կողմից դեմպինգային գներով առևտրի համար:  Թուրքիայի տարածքով են անցնում ԻՊ-ի նավթային հոսքերը, հնաոճ իրերի վաճառքը ևս արվում է Թուրքիայով»,- ասաց քաղաքագետը:

Ֆրանսիայի նախագահ Ֆրանսուա Օլանդը ԱՄՆ նախագահ Բարաք Օբամայի հետ հանդիպմանը կոչ է արել փակել թուրք-սիրիական սահմանը: Ըստ Օլանդի, դա անհրաժեշտ է ահաբեկիչների հոսքը Եվրոպա կասեցնելու համար: Սահմանները փակելու հարցն Օլանդը քննարկել է նաև ՌԴ նախագահ Վլադիմրի Պուտինի հետ հանդիպմանը: