Մարի Լը Պենը Եվրամիությունը համեմատել է աղանդի հետ
ՓԱՐԻԶ, 6 ՀՈՒԼԻՍԻ, ԱՐՄԵՆՊՐԵՍ: Ֆրանսիական «Ազգային ճակատ» կուսակցության ղեկավար Մարի Լը Պենը ֆրանսիական SUD RADIO-ի եթերում խոսել է Եվրամիության ապագայի մասին եւ կառույցը համեմատել աղանդի հետ:
«Եվրամիությունը վերածվել է իսկական հսկայական աղանդի, որտեղ կատարվում է ուղեղների լվացում եւ շանտաժ»,- հայտարարել է Լը Պենը` հարցնելով, թե արդյոք եվրոպացի ժողովուրդը շարունակելո՞ւ է դա համբերել: Քաղաքական գործիչը համոզված է, որ եվրոպական երկրները պետք է վերադառնան իրենց ազգային արժույթներին: «Երկրի տնտեսական ուղղությունը կախված է նրա ինքնիշխաությունից»,- «Արմենպրես»-ին փոխանցմամբ՝ ասել է Լը Պենը:
«Ազգային ճակատ» ֆրանսիական կուսակցությունը պահպանողական արժեքների կողմնակից է: Նրանք կողմ են ներգաղթի չափերի կրճատմանը, եւ դեմ են եվրոպական ինտեգրմանը: Եվրախորհրդարանի վերջին ընտրությունների ժամանակ կուսակցությունը 25,4 տոկոս ձայն էր հավաքել: Լը Պենը բազմիցս աջակցել է Ռուսաստանի արտաքին քաղաքականությանը, այդ թվում՝ Ուկրաինայի հարցում:
Բաժանորդագրվեք մեր ալիքին Telegram-ում