Նյու Յորքում անհայտ անձը կրակել է ոստիկանի վրա
ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ: Նյու Յորքի Կունիս շրջանում ծառայություն իրականացնող ոստիկան է վիրավորվել: «Արմենպրես»-ի հաղորդմամբ՝ ինչպես տեղեկացնում է «ՏԱՍՍ»-ը, տեղի իշխանությունները հայտնել են, որ անվտանգության աշխատակիցը հոսպիտալացվել է :
Նրանց տվյալներով, ոստիկանի վրա կրակած անձի որոնման աշխատանքներին միացել են իրավապահ մարմինների տասնյակ աշխատակիցներ, որոնողական աշխատանքներ են իրականացվել նաև ուղղաթիռների օգնությամբ: Կասկածյալը ձերբակալվել է, առայժմ հայտնի չեն նրա արարքի դրդապատճառները:
Բժշիկները հոսպիտալացված ոստիկանի առողջական վիճակը գնահատում են ծանր: Նրան արդեն այցելել է Նյու Յորքի քաղաքապետը: Տեղական լրատվամիջոցները չեն բացառում, որ միջադեպը կարող է կապված լինել ամերիկյան Բալթիմոր քաղաքում տեղի ունեցած իրադարձությունների հետ, որտեղ վեց ոստիկանների մեղադրում են երիտասարդ աֆրոամերիկացի Ֆրեդի Գրեյի սպանության մեջ:
Բալթիմորում ապրիլի 25-ին բախումներ են տեղի ունեցել ոստիկանների և մի խումբ ցուցարարների միջև: Գրեյի հուղարկավորության ժամանակ այդ բախումները վերածվեցին զանգվածային անկարգությունների:
Բաժանորդագրվեք մեր ալիքին Telegram-ում