ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ: Հունահռոմեկան ոճի ըմբշամարտի Հայաստանի ազգային հավաքականի անդամ 66 կգ քաշային ըմբիշ Միհրան Հարությունյանը վարպետության դաս կանցկացնի:  

Նոյեմբերի 27-ին ժամը 19:00-ին Մոսկվայում խառը մենապայքարային մարտարվեստների «ԳրԷպլինգ» ակումբի «Ասգար» մարզահամալիրում վարպետության դաս կանցկացնի հունահռոմեկան ոճի ըմբշամարտի Հայաստանի ազգային հավաքականի անդամ 66 կգ քաշային ըմբիշ Միհրան Հարությունյանը:  Նա 2011թ. Ռուսաստանի փոխչեմպիոնն է, 2012 թ. չեմպոինը, իսկ 2013թ. արդեն Հայաստանի չեմպիոն է դարձել, բազմաթիվ միջազգային մրցաշարերի հաղթող ու մրցանակակիր է:

 «Արմենպրես»-ի հաղորդմամբ, այս մասին տեղեկացնում է Հայաստանի ըմբշամարտի ֆեդերացիան:
Ըմբշամարտը խառը մենապայքարային մարտարվեստներում հաղթանակի հասնելու կարևորագույն գործոններից է, դրա հետ սերտորեն կապված են մարտիկին շատ անհրաժեշտ այնպիսի հատկանիշներ, ինչպիսիք են դիմացկունությունն ու ֆիզիկական ուժը: 
Մուտքը մարզադահլիճ ազատ է, սակայն տեղերը սահմանափակ են: Այդ պատճառով ակումբի ղեկավարությունը խնդրում է, որ ովքեր գրանցված չեն ակումբում, նախապես կապվեն ակումբի տնօրինությանը և միջոցառմանը ներկա գտնվելու հայտ ներկայացնեն: