ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ փոխվարչապետ, տարածքային կառավարման նախարար Արմեն Գեւորգյանն այսօր` հոկտեմբերի 2-ին, ընդունել է Համաշխարհային բանկի` Եվրոպայի եւ Կենտրոնական Ասիայի տարածաշրջանի կայուն զարգացման թիմի պատվիրակությանը: Ինչպես «Արմենպրես»-ին տեղեկացրին ՀՀ տարածքային կառավարման նախարարության հասարակայնության հետ կապերի բաժնից, քննարկվել են հանրապետության հարավային մարզերում զբոսաշրջային ենթակառուցվածքների զարգացմանն ուղղված նոր ծրագրի նախապատրաստման, ծրագրի իրականացման պատասխանատու կառույցների ընտրությանը վերաբերող հարցեր:

Առաջարկվել է ծրագրի ինստիտուցիոնալ եւ  գործնական բաղադրիչների համար առանձին պատասխանատուներ ընտրել: Մասնավորապես, քննարկվել է ինստիտուցիոնալ բաղադրիչը ՀՀ էկոնոմիկայի նախարարության համապատասխան կառույցների, իսկ  ենթակառուցվածքների զարգացմանն ուղղված գործնական ծրագրերը՝  նոր ձեւավորվող Տարածքային զարգացման հիմնադրամի կողմից իրականացնելու հնարավորությունը: Փոխվարչապետը նշել է, որ նոր հիմնադրամի հիմնական նպատակը տարածքների համակողմանի զարգացման աջակցությունն է, եւ նախատեսվում է, որ հիմնադրամը համակարգելու է տարբեր ոլորտներում իրականացվող ծրագրերը, որոնց վերջնական նպատակը տարածքների, համայնքների զարգացումն է:

Հյուրերը  դրական եւ հետաքրքիր են համարել Տարածքային զարգացման հիմնադրամի ձեւավորման գաղափարը՝ նկատելով, որ նմանատիպ հիմնադրամի գործունեության հաջող փորձ առկա է նաեւ այլ երկրներում:

Զրուցակիցները քննարկել են նաեւ ՀԲ աջակցությամբ խմելու ջրի ոլորտում իրականացվող եւ իրականացվելիք ծրագրերին առնչվող հարցեր: