ԵՐԵՎԱՆ, 17 ՍԵՊՏԵՄԲԵՐԻ, ԱՐՄԵՆՊՐԵՍ: Հայկական հոգեբուժական ասոցիացիայի նախագահ Արմեն Սողոյանը Մադրիդում ընթացող Համաշխարհային հոգեբուժության XVI վեհաժողովի շրջանակում սեպտեմբերի 16-ին տեղի ունեցած Գլխավոր ասամբլեայի նիստում ընտրվել է Համաշխարհային հոգեբուժական ասոցիացիայի գործադիր վարչության անդամ` ֆինանսական քարտուղար։ «Արմենպրես»-ի հաղորդմամբ` ՀՀ առողջապահության նախարարության հետ հեռախոսազրույցում Արմեն Սողոյանը տեղեկացրել է, որ իր օգտին է քվեարկել ընտրողների ճնշող մեծամասնությունը` զգալի առավելություն ապահովելով մրցակցի` ԱՄՆ-ի ներկայացուցչի նկատմամբ:

Համաշխարհային հոգեբուժական ասոցիացիայի անդամ է աշխարհի 135 կազմակերպություն` 117 երկրից:

Ասամբլեայի նիստում Համաշխարհային հոգեբուժական ասոցիացիայի գործադիր վարչության ընտրություններում նախագահ է ընտրվել Հելեն Հերմանը (Ավստրալիա), Գլխավոր քարտուղար՝ Ռոյ Կալիվայալը (Հնդկաստան), Հանդիպումների քարտուղար՝ Մասատոշի Տակեդան (Ճապոնիա), Ֆինանսական քարտուղար՝ Արմեն Սողոյանը (Հայաստան):