ԵՐԵՎԱՆ, 24 ՀՈՒԼԻՍԻ, ԱՐՄԵՆՊՐԵՍ: Ավիացիոն տեխնիկայի՝ աշխարհի խոշորագույն արտադրողը՝ Միացյալ Նահանգների Boeing Co. կոնցեռնը, Իրանի Iran Air ավիաընկերության հետ կնքել Է ինքնաթիռների պահեստամասերի մատակարարման պարտավորագիր՝ դառնալով ԱՄՆ-ի առաջին ընկերությունը, որն Իրանի հետ գործարարություն Է վարում 1979 թվականից ի վեր առաջին անգամ: Այդ մասին, ինչպես տեղեկացնում Է «Արմենպրես»-ը, հուլիսի 24-ին հաղորդել Է France-Presse գործակալությունը՝ վկայակոչելով Boeing Co.-ի հաշվետվությունը:

Համաձայնագիրը կնքվել Է 2014 թվականի երկրորդ եռամսյակում: ԱՄՆ-ի ավիաարտադրողն Iran Air-ին կմատակարարի ինքնաթիռների պահեստամասեր, հրահանգներ, օդանավագնացական քարտեզներ եւ տվյալներ, ինչպես նաեւ ինքնաթիռների վերափոխման, հանրանավերի դետալների փոխարինման եւ դրանց վիճակի ստուգման հանձնարարականներ:   

Բացի դրանից, բանակցություններ են ընթանում Միացյալ Նահանգների ընկերության եւ Iran Air Tours դուստր ընկերության միջեւ համանման ծառայությունների տրամադրման շուրջը: Ինչպես հայտնել Է Boeing-ը, այս տարվա երկրորդ եռամսյակում ընկերությունը զուտ շահույթ չի ստացել իրանցիների հետ գործարքից:

Boeing Co. կոնցեռնը 2014 թվականի ապրիլին ստացել Է Իրանի ավիաընկերությունների հին հանրանավերի թռիչքների անվտանգության ապահովման համար անհրաժեշտ բաղադրիչների վաճառքի՝ ԱՄՆ-ի ֆինանսների նախարարության թույլատրագիրը՝ այդ երկրի նկատմամբ Արեւմուտքի երկրների պատժամիջոցների մեղմացման համաձայնագրի շրջանակներում: Ինչպես նշել են զանգվածային լրատվամիջոցները, ԱՄՆ-ի ֆինանսների նախարարության թույլատրագիրը Իսլամական Հանրապետությանը նոր ինքնաթիռների մատակարարումներ չի ենթադրում, հաղորդել Է ՌԻԱ Նովոստին: