ԵՐԵՎԱՆ, 17 ԱՊՐԻԼԻ, ԱՐՄԵՆՊՐԵՍ: Ֆրանսիայի նախագահ Ֆրանսուա Օլանդի` մայիսին կայանալիք պետական այցը կուղեկցվի Հայոց ցեղասպանության վերաբերյալ հայտարարություններով, որոնք կլինեն ի նպաստ Հայաստանի եւ կառաջացնեն թուրքական կողմի բարկությունը: «Արմենպրես»-ի հարցին ի պատասխան թուրքագետ Ռուբեն Մելքոնյանն ասաց, որ ավանդաբար Ֆրանսիան Եվրոպայում ամենահայամետ ընկալվող երկիրն է, հետեւաբար Ֆրանսիայի նախագահի պետական այցի ժամանակ անդրադարձ կլինի Հայոց ցեղասպանությանն ու կկարեւորվի միջազգային ճանաչման հարցը: Միաժամանակ թուրք-ֆրանսիական հարաբերությունները ջերմ են, եւ դրանց հիմքում ոչ միայն տնտեսական, այլեւ աշխարհաքաղաքական շահերն են: Թուրքագետը թուրք-ֆրանսիական հարաբերությունները դիտարկում է երկու հարթության մեջ` հավելելով, որ երկու պետություններն էլ ՆԱՏՕ-ի անդամներ են, բացի այդ, սիրիական ճգնաժամի առնչությամբ Թուրքիայի եւ Ֆրանսիայի արտաքին քաղաքական ուղեգիծը գրեթե նույնն է: «Այս առնչությամբ պետք է փաստել, որ հարաբերությունները ենթադրում են երկկողմ շահ եւ կառուցված են փոխշահավետ հիմքերի վրա»,- ասաց թուրքագետը:

Մայիսին նախատեսված է Ֆրանսիայի նախագահ Ֆրանսուա Օլանդի առաջին պետական այցը Հայաստան: Այս տարվա սկզբին Թուրքիա կատարած այցի ժամանակ Օլանդը խոսել էր Հայոց ցեղասպանության մասին, կոչ արել Թուրքիային առերեսվել սեփական պատմությանն ու հավաստիացրել, որ ջանքեր է գործադրելու, որպեսզի Ֆրանսիայում ընդունվի Հայոց Ցեղասպանություն ժխտումը քրեականացնող օրինագիծը: 2002թ. Ֆրանսիան ճանաչել է Հայոց ցեղասպանությունը: Ֆրանսիայի նախորդ երկու նախագահները` Ժակ Շիրակն ու Նիկոլյա Սարկոզին կարեւորել են Հայոց ցեղասպանության միջազգային ճանաչման հարցը` հետագա ցեղասպանությունները կանխելու համար: