ԵՐԵՎԱՆ, 27 ՀՈՒՆՎԱՐԻ, ԱՐՄԵՆՊՐԵՍ։ Արգենտինահայ գործարար Էդուարդո Էռնեկյանը, ով «Կորպորասիոն Ամերիկա» ընկերության սեփականատերն է  պատրաստվում է ներդրումներ կատարել Հարավային Եվրոպայում` օգտագործելով ճգնաժամի հետևանքով առաջացած ցածր գների առավելությունը:

«Մեր հոլդինգը շատ ակտիվ կերպով կմտնի այդ հատված , քանի որ ճգնաժամը մեծ հնարավորություն է բացել մեր առաջ», - ինչպես փոխանցում է «Արմենպրես»-ը` վկայակոչելով grreporter.info  կայքը, այս մասին  «Կորպորասիոն Ամերիկա»  ընկերության նախագահ Մարտին Էռնեկյանը, ով նաև Էդուարդո Էռնեկյանի զարմիկն է, ասել է հունվարի 22-ին Շվեյցարիայում տված հարցազրույցում:

Նա նշել է, որ իրենց առաքելությունն է  ընդլայնվել դեպի ԱՄՆ և Եվրոպա` կենտրոնանալով միջերկրածովային հատվածի վրա:

«Մենք միշտ ներդրում ենք կատարում այն նախագծերում, որոնք թույլ են տալիս մեզ  պահպանել կառավարման հսկողությունը»,- նշել է գործարարը:

Նրա նշել է, որ «Կորպորասիոն Ամերիկա» ընկերության տարեկան եկամուտը կազմել է 1.2 միլիարդ դոլար, ինչը նշանակում է, որ ներկայումս այն չունի ոչ մի ֆինանսական խնդիր, որի լուծման համար լինի պարտատոմսերի շուկաներ մտնելու անհրաժեշտություն:

«2010 թվականին ընկերության հասույթը բոնդային շուկաներից կազմել է 300 միլիոն դոլար, որպեսզի վերանորոգվի Ezeiza օդանավակայանը  Բուենոս Այրեսում:  Բացի այդ, Բրազիլիայի զարգացացման բանկը ֆինանսավորել է այն շատ ցածր գնով»,- հավելել է Մարտին Էռնեկյանը:

Bloomberg-ի հարցման համաձայն` ընկերությունը հույս ունի գնել  Public Private Property ընկերության առաջարկած 21 հունական օդանավակայանները:

Հունաստանի կառավարությունը  գործողություններ  է կատարում  ծայրամասային օդանավակայանների գործառութային անկախացման ուղղությամբ: Կառավարությունն օդանավակայանները բաժանել է խմբերի, և դրանք հետագայում կսեփականաշնորհվեն կամ կլուծարվեն  գործարքների արդյունքում:  Նման սեփականաշնորհումից հետո Հունաստանի քաղաքացիական ավիացիայի ղեկավարոթյունը ցանկանում է, որ իրենք  պահպանեն ավիացոն ծառայություն մատուցողի և օդային երթևեկություն մատակարարի իրենց դերը: 

Public Private Property գործակալությունը իրականացնում է միջազգային բաց մրցույթ երկու խմբերի համար, որտեղ ներառված են 14-20 ծայրամասային օդանավակայաններ:

Տարածաշրջանային օդանավակայանների հատվածը Հունաստանում բաղկացած է 39 օդանավակայաններից:

Էդուրադո Էռնեկյանը արգենտինահայ գործարար է։ Նրա կարողությունը 2013 թվականին կազմել է է 1,8 միլիարդ ԱՄՆ դոլար։ Արգենտինայի ամենահարուստ մարդկանց ցանկում 81-ամյա գործարարը գտնվում է երկրորդ տեղում։ Ներկա դրությամբ` Էռնեկյանի հսկողության տակ են գտվում 49 օդանավակայաններ տարբեր երկրներում (Արգենտինա, Իտալիա, Հայաստան, Էկվադոր, Պերու, Բրազիլիա, Ուրուգվայ), և ունի ավելի քան 1000 քառ. կմ հողամաս։ Էռնեկյանը ամենից հայտնի ձեռնարկություններն են՝ Aeropuertos Argentina 2000-ը և «Կորպորասիոն Ամերիկա» ընկերությունները։ Գործարարին են նաև պատկանում America TV հեռուստացանցը, 4 ռադիոկայան և El Cronista ֆինանսական ամսագիրը։ 

2001 թվականից Էռնեկյանի «Կորպորասիոն Ամերիկա» ընկերությանն է պատկանում «Արմենիա միջազգային օդանավակայաններ» ընկերությունը՝ Հայաստանի խոշորագույն «Զվարթնոց» միջազգային օդանավակայանի հետ միասին։ 2006թ. գործարարը ձեռք է բերել Հայաստանում մեծությամբ երրորդ՝ «Կոնվերս Բանկ» ՓԲԸ-ի բաժնետոմսերի 95 տոկոսը։ 2012թ. հայտարարվեց, որ գործարարը պատրաստվում է տեղեկատվական տեխնոլոգիաների գործարան հիմնել Երևանում։ Էդուարդո Էռնեկյանը նաև խոշոր ներդրումներ է իրականացնում գյուղատնտեսության ոլորտում։