Թուրքիայում ԱՄՆ դեսպանն այցելել է Աղթամարի Սուրբ Խաչ եկեղեցի
ԵՐԵՎԱՆ, 24 ՀՈՒՆԻՍԻ, ԱՐՄԵՆՊՐԵՍ: Թուրքիայում ԱՄՆ դեսպան Ֆրենսիս Ռիկարդոնեն իր կնոջ հետ այցելել է Վանի Աղթամար կղզում գտնվող հայկական Սուրբ Խաչ եկեղեցի, որտեղից հեռացել է խոր տպավորություններ ստացած: Ինչպես հաղորդում է «Արմենպրես»-ը, այս մասին տեղեկացնում է թուրքական «Միլլիեթ» պարբերականը:
ԱՄՆ դեսպանն այցելությունից հետո կիսվել է իր տպավորություններով` հրավիրելով ԱՄՆ այլ քաղաքացիների ևս անպայման այցելել Վան: Նա նշել է, որ ավելի վաղ ևս ցանկություն է ունեցել այցելել Վան և գնել մի վանա կատու, սակայն նախկինում նման հնարավորություն չի ունեցել: «Իմացա, որ վաղը Ֆլորիդայից Վան ամերիկացիներ են գալու: Ցանկացանք խրախուսել նրանց, հիշեցնել, թե որքան գեղեցիկ է Վանը»,- ասել է Թուրքիայում ԱՄՆ դեսպանը:
Այցելության վերջում Վանի նահանգապետ Մյունիր Քարաօղլուն Ռիկարդոնեին է նվիրել Աղթամարի հայկական եկեղեցով պատկեր:
Բաժանորդագրվեք մեր ալիքին Telegram-ում