Հայաստանում բարելավվել է սննդի և սպասարկման որակը. սպառողների իրավունքների պաշտպան

ԵՐԵՎԱՆ, 1 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանում ակնառու բարելավվել է սննդի և սպասարկման որակը: «Արմենպրես»-ի հաղորդմամբ՝ այս մասին լրագրողների հետ հանդիպմանը նշեց Սպառողների միության նախագահ Արմեն Պողոսյանը:

«Իհարկե, սննդի անվտանգությունն ու սպասարկման որակը հեռու են կատարյալ լինելուց, սակայն առաջընթացը մեծ է: Ես չեմ ընդումում այն հայտարարությունները, որ ամենը վատ է, սնունդը թունավոր է և այլն», - ասաց Արմեն Պողոսյանը:

Սակայն, դրա հետ մեկտեղ Սպառողների միության նախագահը նկատեց, որ երեխաների սննդի խնդիրը, մանկապարտեզներում թունավորումների դեպքերը շարունակում են մնալ օրակարգային: Հիշեցնելով այս տարի մայիսին Արմավիրի մարզում մոտ քառասուն երեխայի թունավորման արդյունքում հիվանդանոցում հայտնվելու դեպքը՝ նա նկատեց, որ իրենք դիմել են բոլոր համապատասխան ատյաններ, սակայն դժգոհեց բովանդակային պատասխանի բացակայությունից: