მაკუნცმა განმარტა, რა შემთხვევაში გაიხმობს სომხეთი საერთაშორისო ინსტანციებიდან აზერბაიჯანის წინააღმდეგ შეტანილ სარჩელებს
2 წუთი კითხვის
სომხეთის რესპუბლიკა საერთაშორისო ინსტანციებიდან აზერბაიჯანის წინააღმდეგ შეტანილ სარჩელებს აზერბაიჯანთან სამშვიდობო ხელშეკრულების საბოლოო ხელმოწერის შემდეგ გაიხმობს.
„არმენპრესის“ ცნობით, ამის შესახებ ეროვნული ასამბლეის მუდმივმოქმედი კომისიების ერთობლივ სხდომაზე პრემიერ-მინისტრის აპარატის ხელმძღვანელმა ლილით მაკუნცმა განაცხადა.
„სომხეთის რესპუბლიკა არასოდეს იტყვის უარს საკუთარი ინტერესების დაცვაზე რომელიმე საერთაშორისო ინსტანციაში. რაც შეეხება სომხეთსა და აზერბაიჯანს შორის არსებულ დავებს, სამშვიდობო პროცესის ლოგიკაში შეიძლება, რა თქმა უნდა, მიღებულ იქნას გადაწყვეტილება ერთმანეთის წინააღმდეგ სარჩელების უკან გაწვევის თაობაზე, მაგრამ ეს იმ შემთხვევაში, თუ სომხეთის რესპუბლიკა და აზერბაიჯანის რესპუბლიკა საბოლოოდ მოაწერენ ხელს სამშვიდობო ხელშეკრულებას“, - განაცხადა მაკუნცმა.
სომხეთსა და აზერბაიჯანს შორის პარაფირებული სამშვიდობო შეთანხმების მე-15 პუნქტი განსაზღვრავს:
„წინამდებარე შეთანხმების ძალაში შესვლიდან ერთი თვის ვადაში მხარეები გაიხმობენ, გააუქმებენ ან სხვაგვარად მოაგვარებენ ნებისმიერ სამართლებრივ პლატფორმაზე წარდგენილ ნებისმიერ და ყველა სახელმწიფოთაშორის სარჩელს, საჩივარს, პრეტენზიას, შესაგებელს, წარმოებასა და დავას, რომლებიც ეხება წინამდებარე შეთანხმების ხელმოწერამდე მხარეთა შორის არსებულ პრობლემებს, და არ წამოიწყებენ მსგავს სარჩელებს, საჩივრებს, პრეტენზიებს, შესაგებლებს, წარმოებებს და არანაირად არ ჩაერთვებიან რომელიმე მესამე მხარის მიერ მეორე მხარის წინააღმდეგ წარდგენილ საჩივრებში, პრეტენზიებში, შესაგებლებსა თუ წარმოებებში“.