სომხეთმა და სლოვენიამ გაფართოებული პოლიტიკური დიალოგის შესახებ ურთიერთგაგების მემორანდუმს მოაწერეს ხელი
2 წუთი კითხვის
სომხეთის საგარეო საქმეთა და საერთაშორისო ვაჭრობის მინისტრმა არარატ მირზოიანმა და სლოვენიის რესპუბლიკის საგარეო და ევროპულ საქმეთა მინისტრმა ტონე კაიზერმა გაფართოებული პოლიტიკური დიალოგის შესახებ ურთიერთგაგების მემორანდუმს მოაწერეს ხელი.
„არმენპრესის“ ცნობით, არარატ მირზოიანმა აღნიშნა, რომ მემორანდუმი ხელს შეუწყობს ორ ქვეყანას შორის არსებული მდიდარი დღის წესრიგის წინ წამოწევას.
„კმაყოფილებით აღვნიშნავთ ორმხრივი პოლიტიკური დიალოგის აქტიურ დინამიკას. არსებობს რიგი მიმართულებები და პროგრამები, სადაც ჩვენ უკვე გვაქვს საკმაოდ წარმატებული გამოცდილება. ეკონომიკა, ჯანდაცვა, განათლება, მეცნიერება, მართლმსაჯულება, ინოვაციები, ტურიზმი, ყველა ამ სფეროში მოსალოდნელია ახალი ინიციატივები“, - განაცხადა მირზოიანმა.
არარატ მირზოიანმა დასძინა, რომ სლოვენიური გამოცდილება და მონაწილეობა ძალიან მნიშვნელოვანი იყო სომხეთში საყოველთაო ჯანდაცვის დაზღვევის სისტემის დანერგვის საქმეში.
„სავაჭრო ბრუნვის მაჩვენებლებიც იზრდება. მხოლოდ მიმდინარე წლის 8 თვის მონაცემები უკვე აღემატება გასული მთელი წლის მონაცემებს. მიუხედავად ამისა, ეს მზარდი მაჩვენებლები ჯერ კიდევ ძალიან მცირეა და ორივე მხარემ ძალისხმევა უნდა გავწიოთ ამ ციფრების გასაზრდელად“, - აღნიშნა მინისტრმა.
სომხეთის საგარეო საქმეთა და საერთაშორისო ვაჭრობის მინისტრმა არარატ მირზოიანმა ასევე განაცხადა, რომ სომხეთსა და სლოვენიას შორის გაიმართება ბიზნესფორუმი ორი ქვეყნის საქმიანი წრეების მონაწილეობით.