სომხეთი თურქეთთან და აზერბაიჯანთან სომხეთ-თურქეთის საზღვრის გახსნის მიზნით მუშაობს - ფაშინიანი

სომხეთი აგრძელებს აზერბაიჯანთან და თურქეთთან მუშაობას სომხეთ-თურქეთის საზღვრის გახსნის მიმართულებით.

„არმენპრესის“ ცნობით, ამის შესახებ ჟურნალისტებთან საუბრისას სომხეთის პრემიერ-მინისტრმა ნიკოლ ფაშინიანმა განაცხადა.

„აზერბაიჯანს ამ საკითხთან დაკავშირებით გარკვეული დათქმები აქვს, დღეს პროცესები სწორედ ამ ეტაპზეა. თუმცა ჩვენ ვაგრძელებთ მუშაობას როგორც აზერბაიჯანთან, ასევე თურქეთთან, რათა გარკვეულ გადაწყვეტებს მივაღწიოთ“, - აღნიშნა ფაშინიანმა.

შეგახსენებთ, რომ სომხეთმა და თურქეთმა ურთიერთობების მოწესრიგების პროცესი 2022 წელს დაიწყეს. მოწესრიგების პროცესში სომხური მხარის სპეციალური წარმომადგენელი იმ დროს სომხეთის რესპუბლიკის ეროვნული ასამბლეის  ვიცე-სპიკერი რუბენ რუბინიანი იყო, თურქული მხარისა კი დიპლომატი სერდარ ქილიჩი. რუბენ რუბინიანი 2026 წლის 3 აგვისტოს სომხეთის რესპუბლიკის ეროვნული ასამბლეის  თავმჯდომარედ აირჩიეს, რის შემდეგაც მან განაცხადა, რომ სომხეთ-თურქეთის მოწესრიგების პროცესში სომხეთის სპეციალური წარმომადგენელი აღარ იქნებოდა. ამ დრომდე სომხეთს ახალი სპეციალური წარმომადგენელი არ დაუნიშნავს. მოწესრიგების პროცესის ფარგლებში სომხეთი და თურქეთი შეთანხმდნენ, რომ საწყის ეტაპზე საზღვარი მესამე ქვეყნების მოქალაქეებისა და დიპლომატიური პასპორტის მქონე პირებისთვის გახსნილიყო, თუმცა ეს შეთანხმებაც ამ დრომდე არ განხორციელებულა.