ფაშინიანი მშვიდობის დამყარებით სომხეთში ინვესტიციების მიმზიდველობის ზრდის შესაძლებლობას ხედავს

სომხეთის პრემიერ-მინისტრი ნიკოლ ფაშინიანი აზერბაიჯანთან მშვიდობის დამყარებით სომხეთში ინვესტიციების განხორციელების მიმზიდველობის ზრდის შესაძლებლობას ხედავს. „არმენპრესის“ ცნობით, ამის შესახებ ფაშინიანმა ნიუ-იორკში „კონკორდიას“ ყოველწლიური სამიტის პანელურ დისკუსიაზე განაცხადა, როდესაც ხელოვნური ინტელექტის ქარხნების გახსნაზე საუბრობდა.

„რაც შეეხება ხელოვნურ ინტელექტს, გასულ წელს, 8 აგვისტოს, პრეზიდენტ ტრამპთან ხელი მოვაწერეთ ურთიერთგაგების მემორანდუმს ხელოვნური ინტელექტისა და ტექნოლოგიების სფეროში თანამშრომლობის შესახებ. ხელოვნური ინტელექტის უკვე ორი ქარხანაა სომხეთში, ეს ძალიან კარგი ამბავია ჩვენი ქვეყნისთვის. ტექნოლოგიები ჩვენი მშპ-ის ყოველწლიური ზრდისა და ჩვენი ეკონომიკის ძალიან მნიშვნელოვანი ნაწილია. მშვიდობის დამყარებით, ჩვენს ქვეყანაში ინვესტიციების მიმზიდველობა გაიზარდება, ჩვენ ამას ვხედავთ, ის იზრდება და მატულობს“, - აღნიშნა პრემიერ-მინისტრმა.

გეღარქუნიქის ოლქის გაგარინის თემში 2026 წლის 1 ივნისს გაიმართა კომპანია Eleveight AI-ის მიერ აშენებული ხელოვნური ინტელექტის პირველი ქარხნის გახსნის ოფიციალური ცერემონია. კომპანია წარმოადგენს რეგიონის პირველ NVIDIA Blackwell B300 AI ქარხანას. ახალი ცენტრი განკუთვნილია ხელოვნური ინტელექტის მასშტაბური გამოთვლების მომსახურებისთვის AI მოდელების სწავლებიდან დაწყებული, ბიზნეს, სამეცნიერო და ინჟინრული გამოყენებებით დამთავრებული. პროექტის პირველი ეტაპის ინვესტიციები 120 მილიონ დოლარს შეადგენს. გაგარინის AI ქარხნის პირველ ეტაპზე განთავსებულია 512 GPU. ცენტრი ამჟამად 1.2 მეგავატი ელექტრო სიმძლავრით ფუნქციონირებს. იგეგმება მისი შემდგომში 5-მდე, ხოლო საბოლოო ეტაპზე 35 მეგავატამდე გაზრდა. ეს გაფართოება საშუალებას მისცემს მრავალჯერ გაზარდოს ცენტრის გამოთვლითი პოტენციალი, განათავსოს ახალი თაობის ათასობით AI პროცესორი და ჩამოაყალიბოს რეგიონული ხელოვნური ინტელექტის ინფრასტრუქტურული ცენტრი.

კომპანია Firebird-მა 2026 წლის აგვისტოში სომხეთში აამოქმედა დსთ-ის რეგიონის უდიდესი AI ქარხანა, შექმნა რა AI გამოთვლითი ახალი ცენტრი, რომელიც დაფუძნებულია NVIDIA-ს დაჩქარებული გამოთვლების ტექნოლოგიებსა და Dell Technologies-ის მაღალი წარმადობის AI ინფრასტრუქტურაზე. AI ქარხნები AI ეპოქის ფუნდამენტური ინფრასტრუქტურაა, რომელიც უზრუნველყოფს აუცილებელ გამოთვლით სიმძლავრეებს სხვადასხვა სფეროში AI მოდელების ფართო მასშტაბით სწავლების, სრულყოფისა და გამოყენებისთვის. ჰრაზდანში AI ქარხნის გახსნის ცერემონიის მონაწილეებს ვიდეომიმართვა გაუგზავნა კომპანია NVIDIA-ს თანადამფუძნებელმა და გენერალურმა აღმასრულებელმა დირექტორმა ჰენსენ ჰუანგმა.