სომხეთში სამდღიანი ვიზიტით საქართველოს თავდაცვის ძალების სამხედრო პოლიციის დეპარტამენტის უფროსი იმყოფება

სომხეთის რესპუბლიკის თავდაცვის სამინისტროს სამხედრო პოლიციის უფროსმა, გენერალ-მაიორმა აშოტ ზაქარიანმა 21 ივლისს სამხედრო პოლიციაში მიიღო საქართველოს თავდაცვის ძალების სამხედრო პოლიციის დეპარტამენტის უფროსის, გენერალ-მაიორ შალვა შენგელიას ხელმძღვანელობით მოქმედი დელეგაცია, რომელიც სომხეთში სამდღიანი ვიზიტით იმყოფება - სამხედრო პოლიციის სფეროში გამოცდილების გაზიარებისა და თანამშრომლობის განვითარების მიზნით.

როგორც „არმენპრესი“ სომხეთის თავდაცვის სამინისტროს მიერ გავრცელებული ინფორმაციიდან იუწყება, შეხვედრისას, გასული წლის ოქტომბერში მიღწეული შეთანხმებების დადასტურებით, მხარეებმა წარადგინეს თავიანთი დანაყოფების სტრუქტურა, ფუნქციები და საქმიანობის თავისებურებები, განიხილეს თანამშრომლობის გაფართოების, გამოცდილების გაზიარებისა და პარტნიორული ურთიერთობების განმტკიცების შესაძლებლობები. შემდეგ დელეგაციის წევრებმა სამხედრო პოლიციის ტერიტორია დაათვალიერეს. შემოვლის დასასრულს „ნაძვების ხეივანში“ ორგანიზაციათა ხელმძღვანელებმა ერთობლივად დარგეს ნაძვი, როგორც სომხეთისა და საქართველოს სამხედრო პოლიციებს შორის უწყვეტი თანამშრომლობისა და მეგობრობის სიმბოლო.