სომხეთის საპარლამენტო არჩევნებს გეოპოლიტიკური კონტექსტი არ გააჩნია - ფაშინიანი

სომხეთში 7 ივნისს დაგეგმილ საპარლამენტო არჩევნებს გეოპოლიტიკური კონტექსტი არ აქვს. „არმენპრესის“ ცნობით, ამის შესახებ 14 მაისს ჟურნალისტებთან შეხვედრისას განაცხადა სომხეთის პრემიერ-მინისტრმა, მმართველი პარტია „სამოქალაქო ხელშეკრულების“ გამგეობის თავმჯდომარემ და პრემიერ-მინისტრობის კანდიდატმა ნიკოლ ფაშინიანმა.

მან უპასუხა კითხვას, ხედავს თუ არა არჩევნებში გარე ჩარევის მცდელობებს და მიიჩნევს თუ არა ასეთი ჩარევის ნაწილად რუსეთის სხვადასხვა პარტიის ლიდერების განცხადებებს იმის შესახებ, რომ მოსკოვმა არ უნდა სცნოს არჩევნების შედეგები მოქმედი ხელისუფლების ხელახალი არჩევის შემთხვევაში.

„როგორც პოლიტიკური პროცესის მონაწილე ძალები, ისე კომენტატორები და სომხეთის ფარგლებს გარეთ არსებული წრეები ამ არჩევნებში გეოპოლიტიკურ ქვეტექსტს ხედავენ. ამ არჩევნებს გეოპოლიტიკური ქვეტექსტი ან კონტექსტი არ გააჩნია და ვერც ექნება ერთი მარტივი ლოგიკით: სომხეთის რესპუბლიკამ აირჩია დაბალანსების და დაბალანსებული პოლიტიკის კურსი. ჩვენს პოლიტიკაში არ არსებობს არანაირი შეთქმულება თუ ვინმეს წინააღმდეგ მიმართული ქმედება“, - განაცხადა ფაშინიანმა.

პრემიერ-მინისტრმა დასძინა, რომ სომხეთსა და სომეხ ხალხს ყოველთვის უნდა ჰქონდეთ ალტერნატივა. „არსებობს ევროკავშირი, არსებობს ევრაზიული ეკონომიკური კავშირი; ჩვენს ხალხს უნდა ჰქონდეს შესაძლებლობა გადაწყვიტოს, რომელი სტრატეგიაა მისთვის ყველაზე პერსპექტიული და ხელსაყრელი“, - აღნიშნა ნიკოლ ფაშინიანმა.

შეგახსენებთ, რომ 8 მაისს სომხეთში 7 ივნისის საპარლამენტო არჩევნების წინასაარჩევნო კამპანია დაიწყო, რომელიც 5 ივნისამდე გაგრძელდება. არჩევნებში მონაწილეობისთვის რეგისტრირებულია 19 პოლიტიკური სუბიექტი - 2 ბლოკი და 17 პარტია.