ამ თემების მიმართ წინდახედულებაა საჭირო: ფაშინიანი მთიან ყარაბაღში აზერბაიჯანის მიერ სომხური ეკლესიის დანგრევის შესახებ ცნობებზე

სომხეთის პრემიერ-მინისტრი ნიკოლ ფაშინიანი გამოეხმაურა ცნობებს იმის შესახებ, რომ აზერბაიჯანმა მთიან ყარაბაღში ყველაზე დიდი სომხური ეკლესია - ყოვლადწმინდა ღვთისმშობლის ტაძარი დაანგრია.

„არმენპრესის“ ცნობით, მთავრობის სხდომის შემდეგ ჟურნალისტებთან საუბრისას, ფაშინიანმა ხაზგასმით აღნიშნა, რომ ამ მომენტში მთავრობა ცდილობს აღნიშნული ინფორმაციის სრულყოფას, თუმცა დასძინა, რომ მსგავსი თემების მიმართ, მით უმეტეს ამ ეტაპზე, წინდახედულებაა საჭირო.

„ამ თემების მიმართ, მით უმეტეს ახლა, წინდახედულებაა საჭირო, რადგან ასეთი თემები ორლესული მახვილია და როგორც ახალი აღთქმა ეუბნება თავის მკითხველს: „რა მსჯავრითაც სჯით, იმავეთი განისჯებით და რა წყაწყაულითაც მიუწყავთ, იმავეთი მოგეწყვებათ“. ასე რომ, ჩვენ დავაკვირდებით, გავაანალიზებთ. არ ვფიქრობ, რომ ჩვენი წარსული გამოცდილების გათვალისწინებით, ამას სახელმწიფო დონეზე საერთაშორისო განხილვის საგნად ვაქცევთ; ეს არის ვითარება, რომელიც სრულად და ამომწურავად უნდა გავიაზროთ“, - აღნიშნა პრემიერ-მინისტრმა.

ჟურნალისტის შენიშვნაზე, რომ კულტურული მემკვიდრეობის განადგურება უფრო მეტად მტრობის გამოვლინებაა, ვიდრე მშვიდობისკენ გადადგმული ნაბიჯი, ფაშინიანმა განაცხადა:

„მე ვთქვი, როგორია მშვიდობის ჩემი კრიტერიუმი. უკვე ორი წელია, სომხეთ-აზერბაიჯანის ორმხრივი სროლების შედეგად ადამიანები აღარ იღუპებიან და აღარ იჭრებიან; სომხეთმა და აზერბაიჯანმა აღიარეს ერთმანეთის ტერიტორიული მთლიანობა, სუვერენიტეტი, საზღვრების ხელშეუხებლობა და პოლიტიკური დამოუკიდებლობა ალმა-ათის დეკლარაციის საფუძველზე. ჩვენ - სომხეთი და აზერბაიჯანი - ნებისმიერ საკითხს სწორედ ამ თვალსაზრისით უნდა მივუდგეთ“.

ბოლო დღეებში, თანამგზავრულ ფოტოებზე დაყრდნობით, ვრცელდება ცნობები, რომ აზერბაიჯანმა მთიან ყარაბაღში ყოვლადწმინდა ღვთისმშობლის ეკლესია დაანგრია.