ფაშინიანმა დააზუსტა, რა შემთხვევაში მიმართავს სომხეთი ოფიციალურად ევროკავშირს სრულუფლებიანი წევრობისთვის

სომხეთის პრემიერ-მინისტრმა ნიკოლ ფაშინიანმა წარმოადგინა, რა შემთხვევაში მიმართავს სომხეთი ოფიციალურად ევროკავშირს გაერთიანების სრულუფლებიანი წევრობის თაობაზე.

„არმენპრესის“ ცნობით, ნიკოლ ფაშინიანმა ამ თემას მმართველი პარტია „სამოქალაქო ხელშეკრულების“ წინასაარჩევნო პროგრამის წარდგენისას შეეხო.

„2023 წლიდან სომხეთში მოქმედმა ევროკავშირის სამოქალაქო მისიამ თავისი წვლილი შეიტანა ჩვენი ქვეყნის სტაბილურობაში აღმოსავლეთ საზღვრების გასწვრივ. 2024 წელს მიღებულ იქნა და ხორციელდება ევროკავშირის პროგრამა „მდგრადობა და ზრდა“, რომელიც სომხეთის მხარდაჭერას ისახავს მიზნად. ევროკავშირის წევრმა სახელმწიფოებმა კონსენსუსური გადაწყვეტილებით სომხეთს დახმარება გაუწიეს „ევროპის მშვიდობის ფონდის“ ფარგლებში. 2025 წელს მიღებულ იქნა კანონი სომხეთის რესპუბლიკის ევროკავშირში გაწევრიანების პროცესის დაწყების შესახებ. დაიწყო დიალოგი სომხეთსა და ევროკავშირს შორის სავიზო რეჟიმის ლიბერალიზაციის შესახებ და სომხეთს გადაეცა შესაბამისი სამოქმედო გეგმა. დაიწყო კონსულტაციები სომხეთსა და ევროკავშირს შორის უსაფრთხოებისა და თავდაცვის საკითხებზე. იმავე წელს ხელი მოეწერა სომხეთ-ევროკავშირის პარტნიორობის სტრატეგიულ დღის წესრიგს. 2018 წლიდან ძალაშია სომხეთსა და ევროკავშირს შორის ყოვლისმომცველი და გაძლიერებული პარტნიორობის შესახებ შეთანხმება.

სომხეთის რესპუბლიკა გააგრძელებს ევროკავშირში გაწევრიანების კრიტერიუმებთან შესაბამისობისთვის აუცილებელი რეფორმების განხორციელებას მათთან სრულ შესაბამისობამდე. როდესაც სომხეთი დააკმაყოფილებს ამ კრიტერიუმებს, ევროკავშირში გაწევრიანება გახდება პოლიტიკური გადაწყვეტილების საკითხი და დამოკიდებული იქნება იმაზე, მზად არის თუ არა ევროკავშირი სომხეთის მისაღებად. თუ პასუხი იქნება დადებითი, სომხეთის რესპუბლიკა შეიტანს განაცხადს ევროკავშირის სრულუფლებიანი წევრობისთვის. თუ არა - ზემოაღნიშნული რეფორმების განხორციელება იქნება სომხეთის რესპუბლიკის სტრატეგიული მონაპოვარი, რადგან სომხეთი გახდება ქვეყანა, რომელიც სრულად შეესაბამება ევროპულ სტანდარტებს“, - განაცხადა ფაშინიანმა.

ევრაზიის ეკონომიკურ კავშირსა და სომხეთს შორის ურთიერთობებსა და მმართველი ძალის წინასაარჩევნო პროგრამაში არსებულ დებულებაზე საუბრისას, ფაშინიანმა აღნიშნა, რომ სომხეთის ხელისუფლება აცნობიერებს - შეუძლებელია ერთდროულად იყო ევრაზიის ეკონომიკური კავშირისა და ევროკავშირის წევრი.

„მაგრამ მანამ, სანამ ევროკავშირთან დაახლოებისა და ევროკავშირის წევრობის კრიტერიუმებთან შესაბამისობისკენ მიმართული რეფორმები თავსებადია ევრაზიის ეკონომიკური კავშირის წევრობასთან, სომხეთის რესპუბლიკა გააგრძელებს ევრაზეს-ის წევრად დარჩენას და განავითარებს სავაჭრო-ეკონომიკურ ურთიერთობებს მის წევრ ქვეყნებთან“, - აღნიშნა სომხეთის პრემიერ-მინისტრმა.