ევროკავშირთან ვიზალიბერალიზაციის პროცესი სომხეთისთვის შედარებით სწრაფად მიმდინარეობს: საგარეო საქმეთა მინისტრის მოადგილე

სომხეთი-ევროკავშირის ვიზალიბერალიზაციის პროცესის დასრულების კონკრეტული ვადები ამ ეტაპზე არ არსებობს, თუმცა პროცესი სწრაფი ტემპით მიმდინარეობს.

 „არმენპრესის“ ცნობით, ამის შესახებ ეროვნული ასამბლეის ევროპული ინტეგრაციის საკითხთა მუდმივმოქმედი კომიტეტის სხდომაზე საგარეო საქმეთა მინისტრის მოადგილემ, ვაჰან კოსტანიანმა განაცხადა.

ფრაქცია „სომხეთის“ დეპუტატმა არმენ გევორგიანმა დასვა კითხვა, არსებობს თუ არა მკაფიო განრიგი ვიზალიბერალიზაციის პროცესის დასრულების შესახებ და აღნიშნა, რომ ეს თემა საზოგადოებაში დიდ ინტერესს იწვევს. „ვიზალიბერალიზაციის დასრულების ზუსტი ვადის მითითება ამ მომენტში შეუძლებელია. ჩვენ სამოქმედო გეგმა გასული წლის ნოემბერში მივიღეთ და ვფიქრობ, პროგრესის პირველი ანგარიში უახლოესი 1-2 თვის განმავლობაში გამოქვეყნდება“, - უპასუხა კოსტანიანმა.

მისი თქმით, სხვა ქვეყნებთან შედარებით, სომხეთისთვის პროცესი საკმაოდ სწრაფად მიმდინარეობს. მინისტრის მოადგილემ ასევე ხაზგასმით აღნიშნა, რომ ამჟამად სომხეთი ერთადერთი ქვეყანაა, რომელთანაც ევროკავშირი ვიზალიბერალიზაციის პროცესს აწარმოებს. კოსტანიანმა წარმოადგინა ძირითადი მიმართულებები, სადაც სომხეთმა რეფორმები უნდა განახორციელოს: მიგრაციული პოლიტიკა, ადამიანის უფლებების დაცვა და საზღვრის ყოვლისმომცველი კონტროლის სისტემის დანერგვა.

შენგენის ვიზების გაცემის პროცესზე საუბრისას მან აღნიშნა, რომ ბოლო წლებში განაცხადების რაოდენობა საგრძნობლად - დაახლოებით 400 პროცენტით გაიზარდა, რამაც მომსახურების ხარისხზეც იქონია გავლენა. „ბოლო რამდენიმე თვის განმავლობაში გარკვეულ დადებით ტენდენციას ვხედავთ ევროპული ქვეყნების საელჩოების მხრიდან, რომლებმაც გაზარდეს თავიანთი საკონსულო პერსონალი“, - თქვა მან.

კოსტანიანმა ასევე დაამატა, რომ მიმდინარეობს მუშაობა ვიზების მოქმედების ვადების გახანგრძლივებაზე, რათა მოქალაქეებს ხშირად არ მოუწიოთ ახალი ვიზის მოთხოვნით მიმართვა. მისი თქმით, ზოგიერთმა ქვეყანამ უკვე დაიწყო ვიზების უფრო ხანგრძლივი ვადით გაცემა.

„შემდეგი მიმართულება, რომელზეც ვმუშაობთ პროცესის გასამარტივებლად, სომხეთში ევროკავშირის წევრი ქვეყნების საელჩოებში საკონსულო პუნქტების გახსნაა. არის ქვეყნები, რომლებსაც აქვთ დიპლომატიური წარმომადგენლობა სომხეთში, თუმცა საკონსულო მომსახურებას არ ეწევიან. უახლესი სიახლე კი ის არის, რომ ბელგიის საელჩომ მიიღო გადაწყვეტილება საკონსულო სექციის გახსნის შესახებ, რაც გარკვეულწილად შეამსუბუქებს არსებულ ტვირთს“, - დაასკვნა კოსტანიანმა.