მთიანი ყარაბაღი ყოველთვის იყო აზერბაიჯანის შემადგენლობაში და სომხეთის რესპუბლიკაც ამას ყოველთვის აღიარებდა, უბრალოდ რეალობა ხალხს უმალავდნენ - ნიკოლ ფაშინიანი

სომხეთის პრემიერ-მინისტრმა ნიკოლ ფაშინიანმა განაცხადა, რომ მთიანი ყარაბაღი ყოველთვის იყო აზერბაიჯანის შემადგენლობაში, სომხეთის რესპუბლიკაც აღიარებდა მთიან ყარაბაღს აზერბაიჯანის შემადგენლობაში, უბრალოდ ეს იმალებოდა სომხეთისა და მთიანი ყარაბაღის მოსახლეობისგან.

„არმენპრესის“ ცნობით, ამის შესახებ ნიკოლ ფაშინიანმა მთავრობის სხდომის შემდეგ ჟურნალისტებთან ბრიფინგზე განაცხადა.

„ორი დღის წინ ურბანული განვითარების კომიტეტის თავმჯდომარე მოვიდა და საკითხს წარადგენდა. და 2000... არ მახსოვს რომელ - 5-6, შესაძლოა 10, 15 ან ნებისმიერ წელს სომხეთში მიმდინარეობდა განსახლების პროგრამის დამტკიცების პროცესი. თანდართულია დოკუმენტები, სომხეთის რესპუბლიკის მთავრობის დოკუმენტები, სადაც სომხეთის რესპუბლიკის აღმოსავლეთით საზღვრები დელიმიტირებულია ისე, როგორც ჩვენ დავაფიქსირეთ მშვიდობის ხელშეკრულების პარაფირებულ ვერსიაში (რედ. შენიშვნა: იგულისხმება 2025 წლის 8 აგვისტოს ვაშინგტონში აზერბაიჯანთან პარაფირებული სამშვიდობო შეთანხმება), ხოლო მისგან აღმოსავლეთით დიდი ასოებით წერია - აზერბაიჯანი. ეს სომხეთის რესპუბლიკის მთავრობის ოფიციალური დოკუმენტია. ეს იმდენად აშკარა რამ არის. ჩვენი პრობლემა რაშია? იმაში, რომ არსებითად სომხეთისა და ყარაბაღის ხალხს რეალობას უმალავდნენ. რატომ იმალებოდა რეალობა? რატომ იმალებოდა 1996 წლის ლისაბონის სამიტის რეალობა? ახლა დოკუმენტები სრულად გამოქვეყნებულია. რატომ არ არის ხმაური ამ დოკუმენტების შესახებ? იმიტომ, რომ ყველაფერი გამოქვეყნებულია და მთელი სიმართლე ხალხის წინაშეა, მაგრამ ამ სიმართლეს ჯერ კიდევ აქვს განვითარების ადგილი - ის, რომ ეს ისტორია მხოლოდ იმაზე იყო, რომ სომხეთს არ მისცემოდა დამოუკიდებელ სახელმწიფოდ ყოფნის საშუალება. ამ პროცესს კი ხელმძღვანელობდნენ ლევონ ტერ-პეტროსიანი, შემდეგ რობერტ ქოჩარიანი, შემდეგ სერჟ სარგსიანი, ახლა კი მათთან დაკავშირებული რუსულ-ბელორუსიელი ოლიგარქები მოიყვანეს, რადგან ხვდებიან, რომ მათი კარტი გათამაშებულია“, - განაცხადა ფაშინიანმა.