მასკატში ომანში სომხეთის საელჩოს გახსნის ცერემონია გაიმართა

18 მარტს, ომანის დედაქალაქ მასკატში, გაიმართა ომანში სომხეთის საელჩოს გახსნის ოფიციალური ცერემონია. ღონისძიებაში მონაწილეობა მიიღეს სომხეთის საგარეო საქმეთა მინისტრმა არარატ მირზოიანმა და ომანის საგარეო საქმეთა მინისტრმა საიდ ბადრ ბინ ჰამად ალ-ბუსაიდიმ.

„არმენპრესის“ ცნობით, ამის შესახებ ინფორმაციას Timesofoman-ი ავრცელებს. აღინიშნება, რომ საელჩოს გახსნა ხდება ორ ქვეყანას შორის მეგობრობისა და თანამშრომლობის გაფართოებული ურთიერთობების ფარგლებში. ეს ასახავს ორი ქვეყნის საერთო მისწრაფებას - გააფართოონ თანამშრომლობისა და პარტნიორობის ჰორიზონტები სხვადასხვა სფეროში ისე, რომ იგი ემსახურებოდეს ორმხრივ ინტერესებს და ხელი შეუწყოს ინვესტიციების, ვაჭრობისა და კულტურული გაცვლის შესაძლებლობებს.

ღონისძიებაზე სიტყვით გამოსვლისას სომხეთის საგარეო საქმეთა მინისტრმა არარატ მირზოიანმა სიამაყე გამოთქვა ომანის სასულთნოში სომხეთის საელჩოს გახსნის გამო. მან ხაზგასმით აღნიშნა, რომ ეს ნაბიჯი ასახავს ორმხრივი ურთიერთობების სიმტკიცეს და მათი განვითარების ერთობლივ სურვილს.

სომხეთის საგარეო საქმეთა მინისტრის მოადგილემ, ვაჰან კოსტანიანმა ომანის საინფორმაციო სააგენტოსთან ინტერვიუში განაცხადა, რომ ომანის სასულთნოსა და სომხეთს შორის ურთიერთობები დინამიური და მზარდია.

კოსტანიანმა აღნიშნა, რომ არაბულ ქვეყნებს შორის ომანი ერთ-ერთი პირველი იყო, რომელმაც სომხეთთან დიპლომატიური ურთიერთობები დაამყარა.

სომხეთის საგარეო საქმეთა მინისტრის მოადგილემ ხაზი გაუსვა, რომ ბოლო ორი წლის განმავლობაში ორ ქვეყანას შორის ურთიერთობები მუდმივად იზრდებოდა, რისი კულმინაციაც იყო ომანში სომხეთის საელჩოს გახსნის გადაწყვეტილება.

გარდა ამისა, ორი ქვეყნის საგარეო უწყებები რეგულარულად ატარებენ პოლიტიკურ კონსულტაციებს.

კოსტანიანმა ხაზი გაუსვა ეკონომიკური კომპონენტის მნიშვნელობას და გამოყო რამდენიმე საკვანძო სფერო, როგორიცაა ტრანსპორტი, მოწინავე ტექნოლოგიები, ხელოვნური ინტელექტი, ღრუბლოვანი სერვისები და ერთობლივი ინვესტიციები.

ვაჰან კოსტანიანმა გამოთქვა სურვილი, რომ სომხეთმა უმასპინძლოს ომანის სასულთნოს დელეგაციას აზრთა გაცვლის მიზნით. მან ასევე აღნიშნა ერთობლივი ღონისძიებებისა და კერძო სექტორის კომპანიებს შორის ორმხრივი შეხვედრების მნიშვნელობა ეკონომიკური კავშირების გასამყარებლად.

ღონისძიების შესახებ ინფორმაცია სომხეთის საგარეო საქმეთა სამინისტრომაც გაავრცელა. აღინიშნა, რომ საელჩოს წინ აღიმართა სომხეთის რესპუბლიკის სამფეროვანი დროშა, გაჟღერდა ორი ქვეყნის სახელმწიფო ჰიმნები და ლენტის გაჭრის საზეიმო ცერემონიის შემდეგ საელჩო ოფიციალურად გახსნილად გამოცხადდა.

სომხეთის საგარეო საქმეთა მინისტრმა ომანელ კოლეგას საელჩოს შენობა დაათვალიერებინა, რის შემდეგაც გაიმართა მოკლე საუბარი დელეგაციების მონაწილეობით.

ღონისძიებას ესწრებოდნენ ომანში აკრედიტებული დიპლომატიური მისიების ხელმძღვანელები და ომანში მცხოვრები სომხეთის მოქალაქეები.

სომხეთის მთავრობამ ომანში საელჩოს გახსნის გადაწყვეტილება 2025 წლის 10 აპრილს მიიღო.

სომხეთის რესპუბლიკასა და ომანის სასულთნოს შორის დიპლომატიური ურთიერთობები 1992 წლის 7 ივლისს დამყარდა.