1 წუთი კითხვის
სომხეთის ახალი კონსტიტუციის ტექსტში დამოუკიდებლობის დეკლარაციაზე მითითება არ უნდა იყოს.
„არმენპრესის“ ცნობით, ამის შესახებ ჟურნალისტებთან საუბრისას სომხეთის პრემიერ-მინისტრმა ნიკოლ ფაშინიანმა განაცხადა. მან უპასუხა კითხვას, რჩება თუ არა უცვლელი მისი პოზიცია იმის შესახებ, რომ კონსტიტუციის ახალ ტექსტში, რომელიც ამ თვეში უნდა გამოქვეყნდეს, დამოუკიდებლობის დეკლარაციაზე მითითება არ უნდა არსებობდეს.
„მე ამ საკითხს უკვე შევეხე და პოზიციის შეცვლის აუცილებლობას ვერ ვხედავ. დიახ, ახალ კონსტიტუციაში დამოუკიდებლობის დეკლარაციაზე მითითება არ უნდა იყოს. გეტყვით რატომ: იმიტომ, რომ დამოუკიდებლობის დეკლარაცია კონფლიქტის ლოგიკაზეა აგებული. ჩვენ არ შეგვიძლია მივყვეთ კონფლიქტის ლოგიკას და ამავდროულად დამოუკიდებელი სახელმწიფოს აშენება გვსურდეს“, - აღნიშნა ფაშინიანმა.
სომხეთის იუსტიციის მინისტრმა, სრბუჰი გალიანმა მანამდე განაცხადა, რომ სომხეთის ახალი კონსტიტუციის ტექსტი 2026 წლის მარტში გამოქვეყნდება.