ეჭვი არ მეპარება, რომ სომხეთსა და აზერბაიჯანს შორის სამშვიდობო შეთანხმება გაფორმდება: ფაშინიანი

სომხეთის პრემიერ-მინისტრ ნიკოლ ფაშინიანს ეჭვი არ ეპარება, რომ სომხეთსა და აზერბაიჯანს შორის სამშვიდობო შეთანხმება გაფორმდება.

„არმენპრესის“ ცნობით, პრემიერ-მინისტრმა ამის შესახებ მთავრობის სხდომის შემდეგ ჟურნალისტებთან გამართულ ბრიფინგზე განაცხადა.

„ეჭვი არ მეპარება, რომ სამშვიდობო შეთანხმება გაფორმდება. როდის მოეწერება მას ხელი, ეს მეორე საკითხია, მაგრამ ის ნამდვილად გაფორმდება“, - განაცხადა ნიკოლ ფაშინიანმა.

პრემიერ-მინისტრის აზრით, ახლა უფრო ნათელია სომხეთისა და აზერბაიჯანის პოზიციების თანხვედრა იმაში, რომ სამშვიდობო შეთანხმების პარაფირების პირობებშიც კი, მშვიდობა უკვე დამყარებულია. „ჩვენ ახლა ვსაუბრობთ მშვიდობის განმტკიცებაზე და მისი შეუქცევადობის უზრუნველყოფაზე. ამ თვალსაზრისით, მნიშვნელოვანია შიდაპოლიტიკური პროცესები როგორც სომხეთში, ისე აზერბაიჯანში. რადგან სომხეთშიც არიან ძალები და, ვვარაუდობ, აზერბაიჯანშიც (გულწრფელად რომ გითხრათ, აზერბაიჯანის შიდაპოლიტიკურ პროცესებს კარგად არ ვიცნობ), რომლებიც მშვიდობით კმაყოფილნი არ არიან და შეეცდებიან პროცესის უკან დაბრუნებას. ჩვენ, სომხეთის რესპუბლიკის მოქალაქეები, უნდა დავიცვათ დამყარებული მშვიდობა და ის შეუქცევადი გავხადოთ“, - აღნიშნა პრემიერ-მინისტრმა.

სომხეთმა და აზერბაიჯანმა 2025 წლის 8 აგვისტოს ვაშინგტონში მოახდინეს სამშვიდობო შეთანხმების პარაფირება.