ნიკოლ ფაშინიანის დარწმუნებით, სომხეთისა და საქართველოს აღქმები TRIPP-თან დაკავშირებით იდენტურია
2 წუთი კითხვის
სომხეთის პრემიერ-მინისტრის, ნიკოლ ფაშინიანის ვიზიტის ფარგლებში, ქართველ კოლეგებს გადაეცათ დეტალური ინფორმაცია იმის შესახებ, თუ რა ხდება TRIPP-ის პროექტის განხორციელების კონტექსტში, ისევე როგორც სომხეთ-თურქეთისა და სომხეთ-აზერბაიჯანის ურთიერთობების პროცესებთან დაკავშირებით.
„არმენპრესის“ ცნობით, ამის შესახებ ნიკოლ ფაშინიანმა სომხეთის ეროვნულ კრებაში კითხვა-პასუხის დროს განაცხადა და დასძინა, რომ ქართველ კოლეგებს ასევე გაუზიარეს სომხური მხარის შეფასებები რეგიონულ ვითარებასთან დაკავშირებით.
კერძოდ, TRIPP-ის პროექტის განხორციელების კონტექსტში საქართველოს პოზიციის შესახებ კითხვაზე პასუხისას, პრემიერ-მინისტრმა გამოთქვა რწმენა, რომ ქართველი კოლეგების აღქმები იდენტურია.
„ვფიქრობ, ეს ხედვის კუთხის საკითხია. თუ ვიხელმძღვანელებთ ვიწრო ხაზების ლოგიკით, სურათი ერთია, ხოლო თუ რეგიონული ლოგიკით - სრულიად სხვა. საუბარია აღმოსავლეთიდან დასავლეთისკენ, კერძოდ, ჩინეთიდან ევროკავშირისკენ და პირიქით, ტრილიონობით ღირებულების საქონლის ტრანსპორტირებაზე. პარალელურად 20 რკინიგზა და 20 გზა რომ გავხსნათ, ისინი მაინც არ იქნება საკმარისი მთელი ამ ტვირთბრუნვის მოსამსახურებლად. შესაბამისად, ვფიქრობ, ახლა ძალიან კარგი მომენტია, რომ სომხეთმა, საქართველომ და აზერბაიჯანმა ამ შესაძლებლობას შეხედონ როგორც საერთოს“, - ხაზგასმით აღნიშნა ფაშინიანმა.
მისი თქმით, სომხეთში, აზერბაიჯანსა და საქართველოში უნდა დომინირებდეს აზროვნება, რომ რეგიონში შეიქმნას სწრაფი და უსაფრთხო ტრანზიტის შესაძლებლობა ათიათასობით და მილიონობით ტონა ტვირთისთვის, რომელიც ამჟამად გზას ეძებს.
სომხეთის პრემიერ-მინისტრის დარწმუნებით, ასეთ შემთხვევაში რეგიონის ყველა ქვეყნის შემოსავალი ათჯერ გაიზრდება, მაშინ როდესაც ცალკე აღებული ვერცერთი ქვეყანა ვერ შეძლებს მსგავსი მოცულობის ნაკადის მომსახურებას.