ფაშინიანმა კობახიძეს სომხეთ-აზერბაიჯანის სამშვიდობო პროცესის მხარდაჭერისთვის მადლობა გადაუხადა

სომხეთის პრემიერ-მინისტრმა ნიკოლ ფაშინიანმა საქართველოს პრემიერ-მინისტრ ირაკლი კობახიძესა და ქართველ ხალხს სომხეთსა და აზერბაიჯანს შორის სამშვიდობო პროცესის მხარდაჭერისთვის მადლობა გადაუხადა.

„არმენპრესის“ გადმოცემით, ამის შესახებ სომხეთის პრემიერ-მინისტრმა საქართველოს პრემიერ-მინისტრთან შეხვედრის შემდეგ, მედიისთვის გაკეთებული განცხადებების დროს აღნიშნა.

„მსურს კიდევ ერთხელ გადავუხადო მადლობა პრემიერ-მინისტრ კობახიძეს იმ მხარდაჭერისთვის, რომელსაც ის მთელი ამ დროის განმავლობაში სომხეთსა და აზერბაიჯანს შორის მიმდინარე სამშვიდობო პროცესის მიმართ იჩენს. ასევე, მსურს მადლობა გადავუხადო საქართველოს სახელმწიფოსა და ხალხს მუდმივი მხარდაჭერისთვის. ეს მხარდაჭერა გრძელდება და ჩვენ ამას ვხედავთ. თქვენ იცით, რომ საქართველოს დახმარებით სომხეთსა და აზერბაიჯანს შორის ეკონომიკური კავშირები მყარდება, რაც ჩვენი მხრიდან ძალიან მაღალ შეფასებას იმსახურებს“, - აღნიშნა ფაშინიანმა.

სომხეთმა და აზერბაიჯანმა 2025 წლის 8 აგვისტოს ვაშინგტონში ხელი მოაწერეს სამშვიდობო შეთანხმების წინასწარ ვერსიას. 2025 წლის დეკემბრიდან მოყოლებული, სომხეთმა რამდენჯერმე განახორციელა აზერბაიჯანიდან ნავთობპროდუქტების იმპორტი საქართველოს ტერიტორიის გავლით, რკინიგზის საშუალებით.