2 წუთი კითხვის
სომხეთის ეროვნული ასამბლეის თავმჯდომარის მოადგილე და სომხეთ-თურქეთის ნორმალიზაციის პროცესში სომხეთის სპეციალური წარმომადგენელი რუბენ რუბინიანი არ ჩქარობს პროგნოზების გაკეთებას აღნიშნულ პროცესში შესაძლო განვითარებების შესახებ․
„არმენპრესის“ ცნობით, ეროვნული ასამბლეის შენობაში გამართულ ბრიფინგზე რუბინიანმა განაცხადა, რომ ამ თემაზე განცხადებების გაკეთებას არ აპირებს, რადგან გამოცდილება აჩვენებს, რომ უმჯობესია დაელოდო მოვლენების განვითარებას და მხოლოდ ამის შემდეგ ისაუბრო.
„რაც შეეხება შემდგომ განვითარებას, ნებას მომეცით ამ ეტაპზე არაფერი ვთქვა, როდესაც დრო მოვა, სათანადო ფორმატში მოგაწვდით ინფორმაციას. მინდა რაიმე მხოლოდ მას შემდეგ ვთქვა, როცა ის რეალურად მოხდება“, - აღნიშნა რუბინიანმა․
რაც შეეხება მესამე ქვეყნების და დიპლომატიური პასპორტის მქონე პირებისათვის სომხეთ-თურქეთის საზღვრის გახსნის ან პროცესის გამარტივების შესაძლებლობას, რუბინიანმა აღნიშნა, რომ ამასთან დაკავშირებით შეთანხმება ჯერ კიდევ 2022 წელს იქნა მიღწეული․
„შეიძლება მხოლოდ საჯაროდ ცნობილი ფაქტი ვახსენო, რომ თურქეთი ალიჯანის საბაჟო პუნქტს აღადგენს“, - განაცხადა მან․
ასამბლეის ვიცე-სპიკერმა ასევე ისაუბრა თურქეთის პრეზიდენტ რეჯეფ თაიფ ერდოღანის ბოლო განცხადებაზე, რომლის თანახმად, სომხეთ-თურქეთის ნორმალიზაციის პროცესში 2026 წლის დასაწყისში სიმბოლური ნაბიჯები იქნება გადადგმული: „არ მსურს ამ თემაზე ბევრი ვილაპარაკო, არა იმიტომ, რომ რამეს ვმალავ ან არ მინდა ინფორმაცია მოგაწოდოთ, არამედ იმიტომ, რომ გამოცდილება გვიჩვენებს․ სჯობს დაელოდო და მხოლოდ შემდეგ გააკეთო განცხადება. არ მსურს პროცესი რაიმე ფორმით დავაზიანო“, - აღნიშნა რუბინიანმა․
მისი თქმით, სომხური მხარის პოზიცია ყოველთვის იყო იმაში, რომ ერევანს სურს ჰქონდეს სრულად ღია საზღვრები და დიპლომატიური ურთიერთობები თურქეთთან რაც შეიძლება მალე. ამ კუთხით, სომხეთის პოზიცია არ შეცვლილა.