სომხეთის რესპუბლიკის საგამოძიებო კომიტეტის თავმჯდომარე სომხეთში ევროსაბჭოს ოფისის ხელმძღვანელს შეხვდა
1 წუთი კითხვის
სომხეთის რესპუბლიკის საგამოძიებო კომიტეტის თავმჯდომარე არტურ პოგოსიანი 9 სექტემბერს სომხეთში ევროსაბჭოს ოფისის ხელმძღვანელს, მაქსიმ ლონგანგეს შეხვდა.
„არმენპრესის“ ცნობით, საგამოძიებო კომიტეტის მიერ გავრცელებულ ინფორმაციაში აღნიშნულია, რომ არტურ პოღოსიანმა მადლობა გადაუხადა მაქსიმ ლონგანგეს სომხეთის სამართალდამცავი სისტემისათვის ევროსაბჭოს მიერ გაწეული მუდმივი მხარდაჭერისთვის.
ევროსაბჭოს წარმომადგენელმა ასევე მადლობა გადაუხადა საგამოძიებო კომიტეტის თავმჯდომარეს მზადყოფნისა და მრავალმხრივი თანამშრომლობისთვის.
შეხვედრისას განიხილეს გამომძიებლების შესაძლებლობების განვითარების პროგრამები, ასევე შეეხნენ თანამშრომლობის გაღრმავების მიმართულებებს, კერძოდ, კიბერდანაშაულის პრევენციისა და გამოვლენის, ბავშვებისა და არასრულწლოვანთა დაცვის სისტემის სრულყოფის, საგამოძიებო კომიტეტში ახალი ტექნოლოგიების დანერგვის საკითხებს.
მხარეებმა აღნიშნეს, რომ საგამოძიებო კომიტეტსა და ევროსაბჭოს ოფისს შორის არსებობს მტკიცე საფუძველი ახალი ინიციატივებისთვის.
შეხვედრის ბოლოს მიღწეული იქნა შეთანხმება გამომძიებლების პროფესიული შესაძლებლობების გაუმჯობესების მიზნით ერთობლივი ტრენინგების ორგანიზების შესახებ.