ირანის პრეზიდენტმა ტელეფონით საუბარში პუტინთან, შეეხო სომხეთში ვიზიტს

ირანის პრეზიდენტმა მასუდ ფეზეშკიანმა რუსეთის პრეზიდენტ ვლადიმირ პუტინთან სატელეფონო საუბრისას განიხილა მისი ბოლო ვიზიტი სომხეთში. „არმენპრესის“ ცნობით, ამის შესახებ „Mehr“-ი იუწყება.

ფეზეშკიანის თქმით, სომხეთის პრემიერ-მინისტრ ნიკოლ ფაშინიანისგან მიიღო დასტური, რომ აზერბაიჯანთან და შეერთებულ შტატებთან განხილვებში და შეთანხმებებში ირანის შეშფოთებები სრულად იქნა გათვალისწინებული.

მან ხაზი გაუსვა, რომ ირანისა და რუსეთის მონაწილეობით „3+3“-ის ფორმატის რეგიონული თანამშრომლობის პლატფორმა კავკასიის რეგიონში არსებული პრობლემების გადაჭრის უფრო ეფექტიანი მექანიზმია.

ფეზეშკიანმა ასევე აღნიშნა, რომ მნიშვნელოვანია ისეთი ორგანიზაციების როლი, როგორიცაა ევრაზიის ეკონომიკური კავშირი , შანხაის თანამშრომლობის ორგანიზაცია და BRICS-ი, თანამშრომლობის გაფართოებისთვის.

ირანის პრეზიდენტმა განაცხადა, რომ პირადად გააკონტროლებს რეშთ-ასტარას რკინიგზის აჩქარებული მშენებლობის პროცესს, რომელიც მნიშვნელოვან როლს ასრულებს ჩრდილოეთ-სამხრეთის საერთაშორისო სატრანსპორტო დერეფნით სპარსეთის ყურის, რუსეთისა და ცენტრალური აზიის დაკავშირებაში.

პუტინმა თავის მხრივ დაადასტურა რუსეთის მტკიცე მხარდაჭერა ირანისთვის ურანის გამდიდრების უფლების მიმართ და ამ უფლებას პარტნიორობის ძირითად და არსებით ელემენტად უწოდა. ასევე აღნიშნა, რომ ორ ქვეყანას შორის ვაჭრობა 2025 წლის პირველ ნახევარში 11%-ით გაიზარდა.

გარდა ამისა, რუსეთის პრეზიდენტმა წარმოადგინა აშშ-ის პრეზიდენტ დონალდ ტრამპთან ალასკაში გამართული ბოლო მოლაპარაკებების ძირითადი შედეგები.