3 წუთი კითხვის
სომხეთის რესპუბლიკის პრემიერ-მინისტრი ნიკოლ ფაშინიანი დარწმუნებულია, რომ 8 აგვისტოს ვაშინგტონის შეთანხმებებით სომხეთი განვითარების ახალ ეტაპზე გადავიდა.
„არმენპრესის“ ცნობით, ფაშინიანმა ასეთი მოსაზრება მთავრობის სხდომაზე გამოთქვა.
პრემიერ-მინისტრმა ჯერ მთავრობის ყველა წევრს მიულოცა სომხეთსა და აზერბაიჯანს შორის დამყარებული მშვიდობა.
„მთავრობის შემადგენლობით, ეროვნული უსაფრთხოების საბჭოს გაფართოებული შემადგენლობით, რესპუბლიკის პრეზიდენტის, ჩვენი საპარლამენტო პარტნიორების მონაწილეობით, ასევე „სამოქალაქო ხელშეკრულების“ ფრაქციასთან ერთად გამართეთ განხილვების სერია. ვაშინგტონში გამგზავრებამდე მოვიწვიეთ კონსულტაციები, განვიხილეთ ტექსტი და მივედით დასკვნამდე, რომ ეს ნაბიჯი საჭირო იყო“, - განაცხადა ფაშინიანმა.
მან მადლობა გადაუხადა მთავრობის ყველა წევრს ჩატარებული სამუშაოსა და პროცესის მხარდაჭერისთვის და ხაზი გაუსვა, რომ ამით მათი მუშაობა არ სრულდება, არამედ იწყება.
„დარწმუნებული ვარ, რომ ამ ნაბიჯით განვითარების ახალ დღის წესრიგზე, ახალ პლატფორმაზე გადავედით. აქ ჩვენი მუშაობის შინაარსი და ენერგია უფრო დიდი უნდა იყოს. ჩვენი მუშაობის ეფექტიანობაც უფრო დიდი უნდა იყოს. წინ ბევრი საქმეა გასაკეთებელი. ეს არის კონსტრუქციული, მშვიდობიანი, შემოქმედებითი სამუშაო და ჩვენ ყველანი მაქსიმალურად უნდა ვიყოთ კონცენტრირებულები ამ საქმეზე“, - აღნიშნა ფაშინიანმა.
პრემიერ-მინისტრმა ასევე ხაზი გაუსვა საზოგადოებასთან კომუნიკაციის მნიშვნელობას, რათა მოქალაქეებმა გაიგონ, რას აკეთებს მთავრობა და რატომ აკეთებს ამას. „დიდ მიღწევებსაც კი პრობლემური ხასიათი აქვს, თუ ამ წარმატებების წარმოშობა საზოგადოებისთვის გაუგებარი დარჩება“, - განაცხადა ფაშინიანმა და დასძინა, რომ უახლოეს მომავალში მთავრობის წევრებმა მეტი ყურადღება უნდა მიაქციონ საზოგადოებრივ კომუნიკაციას.
პრემიერ-მინისტრმა მთავრობის ყველა წევრს წარმატება უსურვა ამ ახალ, მშვიდობის ინსტიტუციონალიზაციის შემოქმედებით ეტაპზე.
8 აგვისტოს ვაშინგტონში სომხეთის პრემიერ-მინისტრმა ნიკოლ ფაშინიანმა და აზერბაიჯანის პრეზიდენტმა ილჰამ ალიევმა აშშ-ის შუამავლობით ერთობლივ დეკლარაციას მოაწერეს ხელი. აშშ-ის პრეზიდენტმა დონალდ ტრამპმა დეკლარაციას მოწმის სახით მოაწერა ხელი. სომხეთმა და აზერბაიჯანმა ასევე წინასწარ მოაწერეს ხელი სამშვიდობო შეთანხმებას და ერთობლივი განაცხადით მიმართეს ეუთოს მინსკის ჯგუფის დაშლის საკითხზე.