368.53
3 րոպեի ընթերցում
Հայաստանի վարչապետ Նիկոլ Փաշինյանը համոզված է, որ օգոստոսի 8-ի վաշինգտոնյան համաձայնություններով Հայաստանը դուրս է եկել զարգացման նոր հարթություն:
«Արմենպրես»-ի փոխանցմամբ՝ Փաշինյանը նման համոզմունք հայտնեց կառավարության նիստում:
Վարչապետը նախ կառավարության բոլոր անդամներին շնորհավորեց Հայաստանի և Ադրբեջանի միջև հաստատված խաղաղության առիթով:
«Կառավարության կազմով, Անվտանգության խորհրդի ընդլայնված կազմով, հանրապետության նախագահի, խորհրդարանական մեր գործընկերների մասնակցությամբ, նաև «Քաղաքացիական պայմանագիր» խմբակցության հետ քննարկումների շարք ենք ունեցել: Ես հրավիրել եմ, Վաշինգտոն մեկնելուց առաջ խորհրդակցություններ, քննարկումներ ու տեքստի վերլուծություններ ենք ունեցել: Եվ եկել ենք այն եզրակացության, որ այս քայլը պետք է անել»,-ասաց Փաշինյանը:
Նա կատարված աշխատանքի և գործընթացին աջակցության համար կառավարության բոլոր անդամներին շնորհակալություն հայտնեց՝ շեշտեց, որ սրանով իրենց աշխատանքը ոչ թե ամփոփվում, այլ սկսվում է:
«Ես համոզված եմ, որ այս քայլով դուրս ենք եկել զարգացման նոր օրակարգ, զարգացման նոր հարթություն: Եվ այստեղ մեր աշխատանքի բովանդակությունն ու էներգիան պետք է ավելին լինի: Մեր աշխատանքի արդյունավետությունը պետք է ավելին լինի: Առջևում շատ մեծ աշխատանք կա անելու: Դա կառուցողական, խաղաղ, ստեղծագործ աշխատանք է: Եվ մենք բոլորս պետք է առավելագույնս կենտրոնացած լինենք այդ աշխատանքի վրա»,-հավելեց Փաշինյանը:
Վարչապետը կարևորեց նաև հանրային հաղորդակցությունը, որ քաղաքացիները հասկանան, թե կառավարությունն ինչ է անում և ինչու է անում: «Նույնիսկ ամենամեծ ձեռքբերումները խնդրահարույց են, եթե այդ հաջողությունների ծագումնաբանությունը հասկանալի չլինի հանրությանը»,-ասաց Փաշինյանը՝ հավելելով, որ առաջիկայում կառավարության անդամները պետք է առավել մեծ ուշադրություն դարձնեն հանրային հաղորդակցությանը:
Վարչապետը կառավարության բոլոր անդամներին հաջողություն մաղթեց այս նոր՝ խաղաղության ինստիտուցիոնալացման ստեղծագործ փուլում:
Հայաստանի վարչապետ Նիկոլ Փաշինյան ու Ադրբեջանի նախագահ Իլհամ Ալիևը օգոստոսի 8-ին Վաշինգտոնում ԱՄՆ-ի միջնորդությամբ համատեղ հռչակագիր են ստորագրել։ ԱՄՆ նախագահ Դոնալդ Թրամփը հռչակագիրը ստորագրել է որպես վկա։ Հայաստանն ու Ադրբեջանը նաև նախաստորագրել են խաղաղության համաձայնագիրը, ինչպես նաև համատեղ դիմում են ներկայացրել ԵԱՀՄ Մինսկի խոսւմբը լուծարելու հարցով։