ლავროვი ალასკაში ტრამპ-პუტინის სამიტს დაესწრება

რუსეთის საგარეო საქმეთა მინისტრი სერგეი ლავროვი მონაწილეობას მიიღებს ალასკაში დაგეგმილ რუსეთ–ამერიკის სამიტში. „არმენპრესის“ ინფორმაციით, ამის შესახებ განაცხადა რუსეთის ფედერაციის საგარეო საქმეთა სამინისტროს ინფორმაციისა და პრესის დეპარტამენტის დირექტორის მოადგილემ, ალექსეი ფადეევმა.

„დიახ, შემიძლია დავადასტურო სერგეი ვიქტოროვიჩ ლავროვის მონაწილეობა ამ ღონისძიებაში, რომელიც იგეგმება ალასკაზე, მომდევნო პარასკევს“, – აღნიშნა მან 13 აგვისტოს გამართულ ბრიფინგზე, რომელიც გამოქვეყნდა რუსეთის საგარეო საქმეთა სამინისტროს ოფიციალურ გვერდებზე სოციალურ ქსელებში.

კრემლმა და თეთრმა სახლმა გასულ კვირას განაცხადეს, რომ რუსეთის ფედერაციის პრეზიდენტი ვლადიმირ პუტინი და ამერიკის შეერთებული შტატების პრეზიდენტი დონალდ ტრამპი ალასკაში შეხვდებიან 15 აგვისტოს. თეთრი სახლის პრეს-მდივანმა ქეროლაინ ლევიტმა განაცხადა, რომ სამიტი გაიმართება ანქორიჯში. CNN-ის ცნობით, თეთრი სახლის ოფიციალურ პირებზე დაყრდნობით, შეხვედრა ჩატარდება ელმენდორფ-რიჩარდსონის სამხედრო ბაზაზე.