სომხეთის პრეზიდენტმა და საქართველოს პრემიერ-მინისტრმა ხაზი გაუსვეს სამხრეთ კავკასიაში მშვიდობისა და სტაბილურობის დამყარების მნიშვნელობას

თურქმენეთში მიმდინარე ზღვაზე გასასვლელის არმქონე და ტრანზიტული განვითარებადი ქვეყნების მესამე საერთაშორისო კონფერენციის ფარგლებში, სომხეთის პრეზიდენტი ვაჰაგნ ხაჩატურიანი საქართველოს პრემიერ-მინისტრ ირაკლი კობახიძეს შეხვდა.

„არმენპრესის“ ცნობით, ამის შესახებ განცხადებას ავრცელებს საქართველოს მთავრობა.

შეხვედრისას საუბარი შეეხო საქართველოსა და სომხეთის რესპუბლიკას შორის არსებულ კეთილმეზობლურ ურთიერთობებს და სტრატეგიულ პარტნიორობას, სხვადასხვა სფეროში წარმატებულ თანამშრომლობას, ასევე რეგიონში მიმდინარე პროცესებს.

„აღინიშნა სამხრეთ კავკასიაში მშვიდობისა და სტაბილურობის განსაკუთრებული მნიშვნელობა. პრემიერ-მინისტრმა განაცხადა, რომ ამ კუთხით მნიშვნელოვანი წინგადადგმული ნაბიჯია სომხეთისა და აზერბაიჯანის ერთობლივი განცხადება სამშვიდობო შეთანხმებაზე მოლაპარაკებების დასრულების შესახებ. ირაკლი კობახიძემ კიდევ ერთხელ დაადასტურა საქართველოს მთავრობის მზადყოფნა, ხელი შეუწყოს დიალოგს და ამ გზით რეგიონში ხანგრძლივი მშვიდობისა და სტაბილურობის უზრუნველყოფას“, - ნათქვამია საქართველოს მთავრობის მიერ გავრცელებულ განცხადებაში.

აღნიშნულია, რომ შეხვედრას საქართველოს ეკონომიკისა და მდგრადი განვითარების მინისტრი მარიამ ქვრივიშვილი და მთავრობის ადმინისტრაციის უფროსი ლევან ჟორჟოლიანი დაესწრნენ.