გაერო იმედს გამოთქვამს, რომ რუსეთსა და აზერბაიჯანს შორის არსებული დავები დიპლომატიური გზით გადაწყდება

გაერო ინფორმირებულია რუსეთსა და აზერბაიჯანს შორის „მზარდი დაძაბულობის“ შესახებ და იმედს გამოთქვამს, რომ მხარეები დაპირისპირებებს დიპლომატიური გზით მოაგვარებენ. როგორც „არმენპრესის“ ინფორმაციით განაცხადა გაეროს გენერალური მდივნის წარმომადგენელმა სტეფან დუჟარიკმა.

„ჩვენ ვიცით რუსეთის ფედერაციასა და აზერბაიჯანს შორის მზარდი დაძაბულობის შესახებ, რომელსაც თან ახლავს ინციდენტები ორივე ქვეყანაში. ვიმედოვნებთ, რომ ყველაფერი დიპლომატიური გზით მოგვარდება და უზრუნველყოფილი იქნება ჟურნალისტური საქმიანობის თავისუფლება“, - აღნიშნა დუჟარიკმა გაეროს ვებსაიტზე გამოქვეყნებულ პრესკონფერენციაზე.

27 ივნისს, რუსეთის უსაფრთხოების ძალებმა ეკატერინბურგში ჩაატარეს ჩხრეკები და დააკავეს რამდენიმე აზერბაიჯანელი, წლების წინ მომხდარ მკვლელობებთან დაკავშირებით. დაკავებებისას ორი ადამიანი გარდაიცვალა. რუსეთის საგამოძიებო კომიტეტმა განაცხადა, რომ ერთ-ერთი მათგანის სიკვდილი გულის უკმარისობით იყო გამოწვეული. ცხედრები გადაგზავნდა აზერბაიჯანში, სადაც დადგინდა, რომ სიკვდილი ძალადობის შედეგად იყო დამდგარი. აზერბაიჯანის საგარეო საქმეთა სამინისტრომ რუსეთის მიმართ პროტესტი გამოთქვა.

ამ მოვლენების შემდეგ, ბაქომ კამპანია დაიწყო მოსკოვის წინააღმდეგ. 30 ივნისს ჩხრეკა ჩატარდა ბაქოში მდებარე რუსეთის საინფორმაციო სააგენტო „Sputnik აზერბაიჯანის“ ოფისში, რომლის დირექტორი და მთავარი რედაქტორი ოთხი თვის ვადით დააკავეს. რუსეთის საგარეო საქმეთა სამინისტრომ პროტესტი გამოთქვა ჟურნალისტების დაკავებასთან დაკავშირებით.

ბაქოში ასევე ოთხი თვით დააკავეს რუსეთის რვა მოქალაქე, რომლებიც ბრალდებულნი არიან ორგანიზებულ დანაშაულებრივ ჯგუფში მონაწილეობაში, ირანიდან ნარკოტიკების გადმოტანასა და კიბერდანაშაულებში.

რუსეთშიც დააკავეს ეკატერინბურგში აზერბაიჯანული დიასპორის ლიდერი შაჰინ შიხლინსკი, რომელიც დაკითხვის შემდეგ გაათავისუფლეს.