ცნობილია სტამბოლში მოლაპარაკებებში მონაწილე რუსეთისა და უკრაინის დელეგაციების შემადგენლობა

სტამბოლში 15 მაისს დაიწყება რუსეთ-უკრაინის პირდაპირი მოლაპარაკებები, რომელშიც მონაწილე რუსეთის დელეგაციის შემადგენლობა ცნობილი გახდა მხოლოდ 14 მაისის საღამოს. დელეგაციას უხელმძღვანელებს რუსეთის პრეზიდენტის თანაშემწე ვლადიმირ მედინსკი. „არმენპრესის“ ცნობით, ამის შესახებ განცხადება კრემლის პრესსამსახურმა გაავრცელა.

დელეგაციის შემადგენლობაში შედიან: რუსეთის საგარეო საქმეთა მინისტრის მოადგილე მიხაილ გალუზინი, რუსეთის შეიარაღებული ძალების გენერალური შტაბის მთავარი სამმართველოს უფროსი იგორ კოსტიუკოვი და თავდაცვის მინისტრის მოადგილე ალექსანდრ ფომინი.

გარდა ამისა, მოლაპარაკებებში უკრაინის მხარესთან მონაწილეობას მიიღებენ ექსპერტებიც.

შეგახსენებთ, რომ ვლადიმირ მედინსკი ასევე ხელმძღვანელობდა რუსულ დელეგაციას 2022 წლის გაზაფხულზე სტამბოლში გამართული მოლაპარაკებების დროს.

თავის მხრივ, უკრაინულმა გამოცემამ „სტრანამ“ გამოაქვეყნა სტამბოლში მიმავალი უკრაინული დელეგაციის შემადგენლობა. რუსეთის მხარესთან მოლაპარაკებებში მონაწილეობას მიიღებენ: უკრაინის პრეზიდენტის ოფისის ხელმძღვანელი ანდრეი ერმაკი, თავდაცვის მინისტრი რუსტემ უმეროვი, საგარეო საქმეთა მინისტრი ანდრეი სიბიჰა და პრეზიდენტის მრჩეველი იგორ ჟოვკვა.

ადრე ასევე ცნობილი გახდა, რომ სტამბოლში გამართულ მოლაპარაკებებში მონაწილეობას მიიღებენ აშშ-ის სახელმწიფო მდივანი მარკო რუბიო, აშშ-ის პრეზიდენტის სპეციალური წარმომადგენელი სტივ უითკოფი და სპეციალური დესპანი კიტ კელოგი.