სომხეთი მიესალმება საქართველოს ინიციატივებს ერევან-თბილისი-ბაქოს თანამშრომლობის პლატფორმების შექმნის შესახებ

სომხეთი მაღალი შეფასებით აღიარებს საქართველოს ძალისხმევას სამხრეთ კავკასიაში სტაბილურობისა და უსაფრთხოების განმტკიცების, ასევე სომხეთსა და აზერბაიჯანს შორის მშვიდობის პროცესის მხარდაჭერის მიმართულებით და მიესალმება საქართველოს ინიციატივებს თანამშრომლობის სამმხრივი პლატფორმების შექმნის შესახებ․

როგორც „არმენპრესი“ იტყობინება, ამის შესახებ სომხეთის რესპუბლიკის პრეზიდენტმა ვაჰაგნ ხაჩატურიანმა ერევანში საქართველოს რესპუბლიკის პრეზიდენტ მიხეილ ყაველაშვილთან შეხვედრის შემდეგ ერთობლივი განცხადების დროს განაცხადა․

„ბოლო პერიოდში სომხეთსა და საქართველოს შორის ურთიერთობები გამოირჩევა მაღალი აქტიურობითა და გაფართოებული შინაარსით. ჩვენი ორმხრივი ურთიერთობები დაფუძნებულია სტრატეგიული პარტნიორობის ლოგიკაზე, დემოკრატიულ ღირებულებებზე, სახელმწიფოების სუვერენიტეტსა და ორ მეგობარ ხალხს შორის ისტორიულად ჩამოყალიბებულ საერთო ქრისტიანულ ფასეულობებსა და მომავლის ხედვაზე“, – განაცხადა ხაჩატურიანმა.

მისი თქმით, ბოლო წლების უპრეცედენტო გააქტიურება და სტრატეგიული პარტნიორობის დამყარება ქმნის მყარ საფუძველს და ავალებს მხარეებს გააორმაგონ ძალისხმევა ურთიერთსასარგებლო თანამშრომლობის გაღრმავების მიმართულებით․

პრეზიდენტმა განსაკუთრებით აღნიშნა სომხეთისა და საქართველოს მიერ ერთმანეთის ტერიტორიული მთლიანობის აღიარების განცხადებების მნიშვნელობა, როგორც სტაბილურობისა და მშვიდობის განმტკიცების ფაქტორი სამხრეთ კავკასიაში.

ხაჩატურიანის შეფასებით, სომხეთ-საქართველოს ურთიერთობები ვითარდება როგორც ორმხრივი, ისე მრავალმხრივი ფორმატების ფარგლებში.

პრეზიდენტებმა შეხვედრაზე განიხილეს ორმხრივი დღის წესრიგის ფართო სპექტრი, მათ შორის პოლიტიკის, ეკონომიკის, განათლებისა და კულტურის, სპორტისა და ახალგაზრდობის სფეროებთან დაკავშირებული საკითხები.

„რა თქმა უნდა, განვიხილეთ ასევე რეგიონული სტაბილურობისა და გრძელვადიანი მშვიდობის დამყარების საკითხებიც. სომხეთი მტკიცედ მზად არის წინ წაიწიოს მშვიდობის დღის წესრიგით და გააგრძელოს თავისი კონსტრუქციული ჩართულობა მშვიდობის პროცესში“, – განაცხადა პრეზიდენტმა.

ხაჩატურიანმა გაიხსენა, რომ სომხეთსა და აზერბაიჯანს შორის მშვიდობის შეთანხმების ტექსტი შეთანხმებულია და ხელმოწერისთვის მზადაა. სომხეთი იმედოვნებს, რომ შესაძლებელია აზერბაიჯანთან ყოვლისმომცველი მშვიდობის დამყარება.

„სომხეთი მაღალი შეფასებით აღიარებს სამხრეთ კავკასიაში სტაბილურობისა და უსაფრთხოების განმტკიცებასთან, ასევე სომხეთსა და აზერბაიჯანს შორის მშვიდობის პროცესის მხარდაჭერასთან დაკავშირებულ საქართველოს ძალისხმევას. ვესალმებით საქართველოს ინიციატივებს სამმხრივი თანამშრომლობის პლატფორმების შექმნის თაობაზე და ვაფასებთ საქართველოს როლს საერთო ეკონომიკური პროექტების განხორციელებისა და თანამშრომლობის სფეროების აღმოჩენის კუთხით“, – განაცხადა პრეზიდენტმა.

ორი ქვეყნის პრეზიდენტებმა ასევე გაცვალეს მოსაზრებები საერთაშორისო მნიშვნელობის რიგ საკითხებზე, მათ შორის გეოპოლიტიკურ მოვლენებსა და რეგიონულ პერსპექტივებზე.

ხაჩატურიანმა გამოთქვა დარწმუნება, რომ სომხეთი და საქართველო გააგრძელებენ პარტნიორული ურთიერთობების გაღრმავებასა და განმტკიცებას.

საქართველოს ინიციატივით, 17 აპრილს თბილისში გაიმართა სომხეთის, საქართველოსა და აზერბაიჯანის საგარეო საქმეთა მინისტრების მოადგილეების შეხვედრა, რომელიც მიეძღვნა რეგიონული თანამშრომლობის პერსპექტივებს.
„შეხვედრის დროს განიხილება სამმხრივი თანამშრომლობის შესაძლებლობები, გამოიკვეთება თანამშრომლობის შესაძლო სფეროები, რათა რეგიონის ქვეყნებმა ერთობლივი მიდგომები შეიმუშაონ სხვადასხვა საკითხის მიმართ“, – განაცხადა შეხვედრამდე საქართველოს საგარეო საქმეთა მინისტრის პირველმა მოადგილემ ლაშა დარსალიამ. შეხვედრას სომხური მხრიდან სომხეთის რესპუბლიკის საგარეო საქმეთა მინისტრის მოადგილე ვაჰან კოსტანიანი და აზერბაიჯანული მხრიდან აზერბაიჯანის საგარეო საქმეთა მინისტრის მოადგილე ელნურ მამედოვი ესწრებოდნენ.