2 წუთი კითხვის
სომხეთსა და თურქეთს შორის ურთიერთობების ნორმალიზაციის პროცესი გრძელდება.
„არმენპრესის“ ინფორმაციით, ამის შესახებ სომხეთის საგარეო საქმეთა მინისტრმა არარატ მირზოიანმა განაცხადა ეროვნული ასამბლეის საგარეო ურთიერთობათა კომიტეტის სხდომაზე, სადაც ის 2024 წლის მთავრობის პროგრამის შესრულების პროცესსა და შედეგებზე ანგარიშს წარადგენდა.
„თურქეთთან ნორმალიზაციის პროცესი ასევე გრძელდება. გარდა დიპლომატიური ურთიერთობების დამყარებისა, განსაკუთრებული მნიშვნელობა აქვს საზღვრების გახსნასა და ჩვენს შორის სატრანსპორტო ინფრასტრუქტურის ამოქმედებას“, – აღნიშნა მირზოიანმა და ხაზი გაუსვა, რომ გიუმრი-ყარსის რკინიგზის ამოქმედება სასიცოცხლო მნიშვნელობის იქნება.
მან გაიხსენა, რომ სომხეთსა და თურქეთს აქვთ გარკვეული შეთანხმებები. მაგალითად, მიღწეულია შეთანხმება, რომ ერთობლივად აღადგინონ ანის ხიდი. „ეს პირდაპირ ეხმიანება უკვე მიღებულ გადაწყვეტილებებს, რომლებიც ითვალისწინებს პირდაპირი საჰაერო ფრენების განხორციელებასა და საჰაერო ტვირთების გადაზიდვის დაბრკოლებების მოხსნას. ასევე გვაქვს შეთანხმებები, რომლებიც ჯერ კიდევ არ განხორციელებულა, მაგალითად, მესამე ქვეყნების მოქალაქეებისთვის საზღვრის გახსნა და მათი თავისუფალი გადაადგილება, ასევე, საზღვრის გახსნა იმ პირებისთვის, რომლებსაც სომხეთისა და თურქეთის დიპლომატიური პასპორტები აქვთ“, – განაცხადა საგარეო საქმეთა მინისტრმა.
მირზოიანმა ასევე აღნიშნა, რომ 28 თებერვლიდან სომხეთ-თურქეთის სახელმწიფო საზღვრის მარგარას გამშვებ პუნქტზე, რომელიც უკვე მთავრობის გადაწყვეტილებით სრულად განახლდა, საზღვრის კონტროლს მხოლოდ სომხეთის სასაზღვრო ჯარები ახორციელებენ.
მან ხაზი გაუსვა, რომ 1 მარტიდან სომხეთის ყველა სასაზღვრო-გამშვებ პუნქტზე სამსახურს უკვე სრულად სომხეთის სასაზღვრო ჯარები ასრულებენ. ამ კონტექსტში, მირზოიანმა მადლობა გადაუხადა რუსეთის პარტნიორებს, რომლებიც აქამდე ამ სამსახურს უზრუნველყოფდნენ.