2 წუთი კითხვის
სომხეთის უშიშროების საბჭოს მდივანი არმენ გრიგორიანი აღნიშნავს, რომ კონსტიტუციის ცვლილების საკითხი სომხეთში ყოველთვის შიდა პროცესი იყო და არ შეიძლება ჰქონდეს რაიმე კავშირი საგარეო პროცესებთან.
„არმენპრესის“ ინფორმაციით, ამის შესახებ არმენ გრიგორიანმა ისაუბრა კითხვაზე პასუხისას, იყო თუ არა პრემიერ-მინისტრ ნიკოლ ფაშინიანის განცხადებაში, სომხეთში ახალი კონსტიტუციის მიღების აუცილებლობის შესახებ, რაიმე კავშირი აზერბაიჯანის პრეზიდენტ ილჰამ ალიევის მოთხოვნასთან.
„კონსტიტუციის ცვლილებებზე საუბარი ჯერ კიდევ 2020 წლიდან მიმდინარეობს. კონსტიტუციის ცვლილება სომხეთში ყოველთვის შიდა პროცესი იყო და ვერანაირად იქნება დაკავშირებული საგარეო პროცესებთან. ეს იყო და დარჩება შიდა პროცესად“, – აღნიშნა სომხეთის რესპუბლიკის უშიშროების საბჭოს მდივანმა.
სომხეთის პრემიერ-მინისტრმა ნიკოლ ფაშინიანმა 19 თებერვალს მოსახლეობისთვის მიმართვაში სომხეთში ახალი კონსტიტუციის მიღების აუცილებლობაზე ისაუბრა.
აზერბაიჯანი აგრძელებს ყალბი თეზისის გავრცელებას, თითქოს სომხეთის კონსტიტუციაში არის ტერიტორიული პრეტენზიები აზერბაიჯანის მიმართ. აზერბაიჯანის პრეზიდენტმა არაერთხელ დაასახელა სომხეთის კონსტიტუციის შეცვლა, როგორც სომხეთთან სამშვიდობო შეთანხმების ხელმოწერის წინაპირობა. სომხეთის პრემიერ-მინისტრმა ნიკოლ ფაშინიანმა და საგარეო საქმეთა მინისტრმა არარატ მირზოიანმა არაერთხელ უარყვეს აზერბაიჯანიდან წამოსული ბრალდებები და განაცხადეს, რომ სომხეთის კონსტიტუციაში აზერბაიჯანის მიმართ არანაირი ტერიტორიული პრეტენზია არ არსებობს.