1 წუთი კითხვის
აშშ-ის პრეზიდენტმა დონალდ ტრამპმა განაცხადა, რომ რუსეთის ლიდერ ვლადიმირ პუტინთან შეხვედრა შესაძლოა საუდის არაბეთში გაიმართოს. „არმენპრესის“ ინფორმაციით, ამის შესახებ ტრამპმა ოვალურ კაბინეტში ჟურნალისტებთან საუბრისას განაცხადა.
ამასთან, თეთრი სახლის ლიდერმა დასძინა, რომ, შესაძლოა, რუსეთს ეწვიოს და პუტინს აშშ-ში უმასპინძლოს.
„საბოლოოდ, ჩვენ შეხვედრას ველით. არსებითად, ველით, რომ ის აქ ჩამოვა, ხოლო მე იქ გავემგზავრები. ჩვენი პირველი შეხვედრა, სავარაუდოდ, საუდის არაბეთში გაიმართება“, - ციტირებს POLITICO ტრამპის სიტყვებს.
მანამდე აშშ-ისა და რუსეთის პრეზიდენტებმა ტელეფონით ისაუბრეს, განიხილეს რუსეთ-უკრაინის კონფლიქტი და მისი დასრულების მიზნით მოლაპარაკებების დაწყების შესაძლებლობა.
ვლადიმირ პუტინთან სატელეფონო საუბრის შემდეგ დონალდ ტრამპმა უკრაინის პრეზიდენტ ვოლოდიმირ ზელენსკისთანაც ისაუბრა.
