პრემიერ-მინისტრმა გაამხილა, რა შეთავაზება გააკეთა სომხეთმა აზერბაიჯანს კომუნიკაციების განბლოკვის შესახებ

სომხეთის პრემიერ-მინისტრმა ნიკოლ ფაშინიანმა განაცხადა, თუ რა წინადადება წარუდგინა სომხეთმა აზერბაიჯანს რეგიონული კომუნიკაციების განბლოკვის საკითხზე.

როგორც „არმენპრესი“ იუწყება, პრემიერ-მინისტრმა ამ საკითხზე პრესკონფერენციის დროს ისაუბრა.

„ჩვენ შევთავაზეთ, რომ აზერბაიჯანის დასავლეთ რეგიონებიდან არსებობდეს სარკინიგზო სატვირთო მიმოსვლა ნახიჩევანის ავტონომიურ რესპუბლიკასთან და საპირისპირო მიმართულებით სომხეთის ტერიტორიით, უფრო კონკრეტულად კი, მეღრის გავლით. რატომ მეღრის გავლით? რადგან მეორე სარკინიგზო მარშრუტი, რომელიც სომხეთსა და აზერბაიჯანს ტავუშის რეგიონში აკავშირებს, ჰაღარწინის მონაკვეთზე მეწყერის გამო იმდენად დაზიანებულია, რომ მის აღდგენას ძალიან დიდი ინვესტიცია სჭირდება. იაფი და რეალისტური ვარიანტია მეღრის სარკინიგზო გზა, რომელიც აზერბაიჯანის დასავლეთ რეგიონებს ნახიჩევანთან დააკავშირებს. ასევე, შევთავაზეთ სარკინიგზო კავშირი ერბახიდან ნახიჩევანის გავლით მეღრის მიმართულებით და საპირისპირო მიმართულებით,“ – განმარტა პრემიერ-მინისტრმა.

მან აღნიშნა, რომ ამ კომუნიკაციებს სომხეთმა აზერბაიჯანის ტერიტორიის გავლით უნდა გამოიყენოს საერთაშორისო ვაჭრობისა და სატვირთო გადაზიდვებისთვის, ხოლო აზერბაიჯანმა სომხეთის ტერიტორიის გავლით, ასევე, საერთაშორისო ვაჭრობისა და სატვირთო გადაზიდვებისთვის.

პრემიერ-მინისტრის თქმით, ამ ეტაპზე, არსებული ატმოსფეროსა და სომხეთ-აზერბაიჯანის ურთიერთობებში არსებული დაძაბულობის გათვალისწინებით, სომხური მხარე მიიჩნევს, რომ პროცესი სატვირთო გადაზიდვებით უნდა დაიწყოს, ხოლო მომავალში, როცა სიტუაცია უფრო მშვიდი იქნება, შესაძლებელია მგზავრთა გადაყვანაზეც ფიქრი.

„ჩვენ ეს შეთავაზება გავაკეთეთ და ველოდებით აზერბაიჯანის დადებით პასუხს. თუ ძალიან გულწრფელად ვიტყვი, აზერბაიჯანის პოზიციების გათვალისწინებით, ვერ ვხედავ, რატომ უნდა უარყონ ეს წინადადება. ჩვენ მოვძებნეთ გადაწყვეტილება, რომელიც ორივე მხარის მიერ დასმულ საკითხებს პასუხობს. ახლა, რას დაარქმევენ ამას ისინი, ცალკე თემაა. არ გამოვრიცხავ, რომ რაც არ უნდა გადაწყდეს, ისინი თავიანთ ინტერპრეტაციას გააკეთებენ, ჩვენ ჩვენსას. მაგრამ მთავარი არის საკითხის არსი და შინაარსი. ის შინაარსი, რომელიც ჩვენ შევთავაზეთ, ჩვენთვის მისაღებია და სრულად შეესაბამება „მშვიდობის გზაჯვარედინის“ პროგრამის ფარგლებში წამოყენებულ პრინციპებს, მაგრამ ასევე პასუხობს იმ მოლოდინებსაც, რომლებიც აზერბაიჯანს მოლაპარაკებების პროცესში აქვს.

ეს ძალიან მნიშვნელოვანია, რადგან ჩვენ არ ვეწინააღმდეგებით შეუფერხებელ კომუნიკაციას, მაგრამ შეუფერხებელი კომუნიკაცია არ ნიშნავს სომხეთის რესპუბლიკის იურისდიქციის გვერდის ავლას. თანამედროვე მსოფლიო მუშაობს იმაზე, რომ ყველა მიმართულებით შეუფერხებელი კავშირები არსებობდეს და ჩვენ მზად ვართ ამგვარი გადაწყვეტილებების მისაღებად“, – დაასკვნა ფაშინიანმა.