ნიკოლ ფაშინიანმა ისაუბრა სომხეთის ევროკავშირის წევრობის კანდიდატად გახდომის შესაძლებლობაზე

ერევანი, 14 მარტი, არმენპრესი. სომხეთის რესპუბლიკის პრემიერ-მინისტრი ნიკოლ ფაშინიანი მიესალმა ევროპარლამენტის მიერ მიღებულ რეზოლუციას ევროკავშირსა და სომხეთს შორის მჭიდრო კავშირების აუცილებლობისა და აზერბაიჯანსა და სომხეთს შორის სამშვიდობო ხელშეკრულების დადების შესახებ. „არმენპრესის“ ინფორმაციით, ამის შესახებ პრემიერ-მინისტრმა მთავრობის სხდომაზე განაცხადა.

მან აღნიშნა, რომ რეზოლუცია გამოხატავს ურყევ მხარდაჭერას სომხეთის რესპუბლიკის სუვერენიტეტის, ტერიტორიული მთლიანობისა და დამოუკიდებლობისადმი 1991 წლის ალმა-ათას დეკლარაციის საფუძველზე, ასევე სოლიდარობას სომხეთსა და აზერბაიჯანს შორის მშვიდობის დამყარების მცდელობებთან.

„ევროპარლამენტმა ამ რეზოლუციით დააფიქსირა სომხეთის რესპუბლიკის მიღწევები დემოკრატიის, კანონის უზენაესობისა და კორუფციასთან ბრძოლის სფეროში, რაც უაღრესად მნიშვნელოვანია ჩვენი ქვეყნის საერთაშორისო აღქმისთვის. რეზოლუციაში მოყვანილი იყო ჩემი განცხადება, რომელიც გასული წლის 17 ოქტომბერს ევროპარლამენტის ტრიბუნიდან გაკეთდა, რომ სომხეთი მზადაა იყოს ევროკავშირთან მაქსიმალურად ახლოს.

მივესალმები ევროპარლამენტის ამ რეზოლუციას, ვფიქრობ, რომ ის სომხეთში საჯარო განხილვის საგანი უნდა გახდეს“, - ხაზგასმით აღნიშნა ფაშინიანმა.

პრემიერ-მინისტრმა ასევე გამოხატა სომხეთის რესპუბლიკის მთავრობის ნება, გააგრძელოს მუშაობა სომხეთ-ევროკავშირის ურთიერთობების შემდგომი გაღრმავებისა და განვითარების მიზნით.