სომხეთისა და ნიდერლანდების საგარეო საქმეთა მინისტრებმა სამხრეთ კავკასიაში მიმდინარე მოვლენები განიხილეს

ერევანი, 8 თებერვალი, არმენპრესი. 8 თებერვალს სომხეთის საგარეო საქმეთა მინისტრი არარატ მირზოიანი ჰააგაში ნიდერლანდების საგარეო საქმეთა მინისტრს ჰანკ ბრაუნს სლოტს შეხვდა. „არმენპრესის“ ცნობით, ამის შესახებ ინფორმაციას სომხეთის რესპუბლიკის საგარეო საქმეთა სამინისტრო ავრცელებს.

შეხვედრაზე აზრთა გაცვლა გაიმართა სომხეთ-ნიდერლანდური ორმხრივი დღის წესრიგისა და პოლიტიკური დიალოგის გაფართოების პერსპექტივების შესახებ. ხაზი გაესვა სომხეთში დემოკრატიისა და კანონის უზენაესობის გასაძლიერებლად გადადგმულ ნაბიჯებს, ასევე ამ მიმართულებით შემდგომი ორმხრივი თანამშრომლობის მზაობას.

სომხეთისა და ნიდერლანდების საგარეო საქმეთა მინისტრებმა განიხილეს სომხეთისა და ევროკავშირის პარტნიორობის საკითხები. არარატ მირზოიანმა ხაზი გაუსვა სხვადასხვა მიმართულებით თანამშრომლობის განვითარებას.

შეხვედრაზე განიხილეს სამხრეთ კავკასიაში ბოლოდროინდელი მოვლენების და ზოგადი უსაფრთხოების ვითარების საკითხები.

სომხეთის რესპუბლიკის საგარეო საქმეთა მინისტრმა ხაზი გაუსვა სომხური მხარის ფუნდამენტურ პრინციპებს სომხეთ-აზერბაიჯანის ურთიერთობების მოწესრიგების პროცესში, კერძოდ, ტერიტორიული მთლიანობისა და საზღვრების განუყოფლობის ცალსახა პატივისცემის მნიშვნელობაზე.

მინისტრმა მირზოიანმა კოლეგის ყურადღება გაამახვილა იმ პრინციპებზე, რომლებიც საფუძვლად უდევს სომხეთის მთავრობის მიერ შემუშავებულ პროგრამას „მშვიდობის გზაჯვარედინი“.

სომხეთისა და ნიდერლანდების საგარეო საქმეთა მინისტრები შეთანხმდნენ გააგრძელონ აქტიური კონტაქტები და დისკუსიები ორმხრივი ინტერესის ყველა საკითხზე.