Պետությունը նախատեսում է ներդնել գյուղացիական կենդանիների հաշվառման և համարակալման համակարգ

ԵՐԵՎԱՆ, 24 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ էկոնոմիկայի նախարարությունը 2020-ին կառավարություն կներկայացնի գյուղացիական կենդանիների հաշվառման և համարակալման ծրագիր:

«Արմենպրես»-ի հաղորդմամբ՝ այս մասին դեկտեմբերի 24-ին հրավիրված ասուլիսում հայտնեց ՀՀ էկոնոմիկայի փոխնախարար Տիգրան Գաբրիելյանը:

«Ես շատ կարևորում եմ, որ 2020-ին կառավարություն ենք ներկայացնելու գյուղացիական կենդանիների հաշվառման և համարակալման ծրագիրը: Մեր նախարարության անձնակազմը շատ ոգևորած է այս ծրագրով, քանի որ առանց իմանալու, թե ինչ ունենք, առանց գույքագրման, մենք չենք կարող զարգացման ծրագրեր իրականացնել»,-ասաց Գաբրիելյանը:

Փոխնախարարը ծրագիրը կարևորեց նաև այն առումով, որ դրանով կկարողանան գյուղացիական կենդանիների հիվանդությունների ավելի լավ վերահսկողություն իրականացնել: Նախարարությունը 2020-ին կներկայացնի նաև բրուցելոզի վերացման ծրագիր: