1 րոպեի ընթերցում
ԳՅՈՒՄՐԻ, 4 ՆՈՅԵՄԲԵՐԻ, ԱՐՄԵՆՊՐԵՍ: ԵՄ-ն ոչ միայն շահագրգռված էՀայաստանում դատական համակարգի բարեփոխումների իրականացմամբ, այլև աջակցում է դրանց։ Ինչպես հաղորդում է «Արմենպրես»-ը, այս մասին նոյեմբերի 4-ին Գյումրիում կայացած մամուլի ասուլիսում նշեց Հայաստանում ԵՄ դեսպան, պատվիրակության ղեկավար տիկին Անդրեա Վիկտորինը։
«Եվրոպական միությունը Հայաստանում շատ սերտ կոնտակտի մեջ է բոլոր շահագրգիռ կողմերի հետ ու շահագրգռված է աջակցելու ՀՀ կառավարությանը՝բարեփոխումների օրակարգի իրականացման գործում և կայուն ժողովրդավարական զարգացումներին։ Այդ իսկ պատճառով Եվրոպական Միությունը աջակցում է դատական համակարգի բարեփոխումների իրականացմանը, և Բրյուսելի գլխամասում մեր հաստատությունները շատ սերտ կապի մեջ են ՀՀ կառավարության հետ»,- նշեց Անդրեա Վիկտորինը։
ԵՄ դեսպանը նաև նշեց, որ Եվրոպական Միությունը շատ սերտորեն և ուշադրությամբ հետևում է դատական համակարգի ներքին բարեփոխումներին ուղղված զարգացումներին և դատական գործերի քննությանը, բայց չի տրամադրում մեկնաբանություն այդ գործերի վերաբերյալ։
Արմենուհի Մխոյան