ԱԱԾ աշխատակիցները խաղարկեցին պատանդների ազատ արձակման հատուկ գործողությունը
1 րոպեի ընթերցում
![ԱԱԾ աշխատակիցները խաղարկեցին պատանդների ազատ արձակման հատուկ գործողությունը](http://armenpress.am/resized/480/static/news/b/2019/09/989347.jpg)
ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ: Ազգային անվտանգության ծառայության «Ա» վարչության հատուկ ստորաբաժանումների ուժերը խաղարկեցին «Գազպրոմ Արմենիա» ՓԲԸ վարչական շենքում գտնվող «պատանդների» ազատ արձակման և «ահաբեկչական խմբի» չեզոքացման հատուկ գործողությունը:
«Արմենպրես»-ի փոխանցմամբ` սեպտեմբերի 25-ին տեղի ունեցած գործողությունն անցկացվեց ԱՊՀ մասնակից պետությունների իրավասու մարմինների «Արարատ-անտիտեռոր-2019» համատեղ հակաահաբեկչական վարժանքի երկրորդ փուլի շրջանակում:
Ազգային անվտանգության ծառայության տնօրենի ժամանակավոր պաշտոնակատար Էդուարդ Մարտիրոսյանը լրագրողների հետ զրույցում նշեց, որ ԱԱԾ բոլոր ստորաբաժանումները մշտապես պետք է պատրաստ լինեն նման իրավիճակների:
«Այս պահին վտանգներ չունենք, սակայն բոլոր ստորաբաժանումները պետք է պատրաստ լինեն նման իրավիճակների»,- ասաց Մարտիրոսյանը:
ԱՊՀ մասնակից պետությունների իրավասու մարմինների «Արարատ-անտիտեռոր-2019» համատեղ հակաահաբեկչական վարժանքն անցկացվում է երեք փուլով՝ 7 օր ընդհանուր տևողությամբ: