ԱԺ-ն ընդունեց խմբակցություններին ՏՄՊՊՀ և ՀԾԿՀ անդամի թեկնածու առաջադրելու իրավունք տվող օրինագիծը
2 րոպեի ընթերցում
ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ ազգային ժողովը երկրորդ ընթերցմամբ և ամբողջությամբ ընդունեց խորհրդարանի նախագահ Արարատ Միրզոյանի ներկայացրած օրենքի նախագիծը: Դրանով առաջարկում է Տնտեսական մրցակցության պաշտպանության պետական հանձնաժողովի և Հանրային ծառայությունները կարգավորող հանձնաժողովի անդամի թափուր պաշտոնում թեկնածու առաջադրելու իրավունքը հերթականորեն վերապահել կառավարությանը՝ վարչապետի փոխարեն, ապա՝ ԱԺ-ի կառավարող, հետո՝ ընդդիմադիր խմբակցություններին:
«Արմենպրես»-ի փոխանցմամբ՝ «Ազգային ժողովի կանոնակարգ սահմանադրական օրենքում լրացումներ կատարելու մասին» և կից ներկայացված օրենքների նախագծերի փաթեթն ընդունվեց ԱԺ սեպտեմբերի 13-ի նիստում քվեարկությամբ:
Օրենքի նախագծով առաջարկվում է ՏՄՊՊՀ և ՀԾԿՀ թափուր պաշտոններում, բացառությամբ այդ մարմինների առաջին կազմերի, թեկնածու առաջադրելու իրավունքը հերթականությամբ վերապահել կառավարությանը՝ վարչապետի փոխարեն, ապա ԱԺ-ի կառավարող, ապա ընդդիմադիր խմբակցություններին:
Գործող օրենքով` Հայաստանի Հանրապետության տնտեսական մրցակցության պաշտպանության պետական հանձնաժողով ինքնավար մարմնի նախագահին և մյուս վեց անդամներին Ազգային ժողովը նշանակում է վարչապետի առաջարկությամբ: Նույն սկզբունքն է գործում նաև Հայաստանի Հանրապետության Հանրային ծառայությունները կարգավորող հանձնաժողովի պարագայում, երբ կառույցի նախագահին և մյուս չորս անդամներին Ազգային ժողովը նշանակում է վարչապետի առաջարկությամբ:
Նախագծին կողմ քվեարկեց 104 պատգամավոր, դեմ՝ 1-ը:
