Հայ վետերանները պարգևատրվել են Բելառուսի ազատագրման համար հոբելյանական մեդալներով
2 րոպեի ընթերցում
![Հայ վետերանները պարգևատրվել են Բելառուսի ազատագրման համար հոբելյանական մեդալներով](http://armenpress.am/resized/480/static/news/b/2019/08/986418.jpg)
ԵՐԵՎԱՆ, 30 ՕԳՈՍՏՈՍԻ, ԱՐՄԵՆՊՐԵՍ: Բելառուսի նախագահ Ալեքսանդր Լուկաշենկոյի հրամանագրով հայ վետերանները պարգևատրվել են Հայրենական մեծ պատերազմի տարիներին Բելառուսի ազատագրման 75-ամյակի հոբելյանական մեդալներով:
«Արմենպրես»-ին այս մասին տեղեկացրին Հայաստանում Բելառուսի դեսպանությունից:
Հուլիսի 11-ին «Հայաստանի Հանրապետության վետերանների միավորում» հասարակական կազմակերպության կենտրոնական գրասենյակում տեղի է ունեցել հանդիսավոր արարողություն, որի ընթացքում Հայաստանում Բելառուսի Հանրապետության արտակարգ և լիազոր դեսպան Իգոր Նազարուկը մեդալները հանձնել է Երևանում ապրող վետերաններին:
Իր ելույթում Իգոր Նազարուկն ընդգծել է Բելառուսի ժողովրդի և Եվրոպայի երկրների հաղթանակի կարևորությունը գերմանա-ֆաշիստական զավթիչների նկատմամբ, ինչպես նաև այն զգալի աշխատանքը, որն իրականացվում է մեր երկրում` Մեծ հայրենականի տարիներին խորհրդային զինվորի գործած սխրանքի հիշողությունը պահպանելու ուղղությամբ:
Վետերաններին, ովքեր չէին կարողացել գալ միջոցառման իրականացման վայր, մեդալները հանձնվել են նույն օրը` նրանց բնակության վայրերում:
Հուլիսի 24-ին պարգևատրվել են Աբովյանում, Մարտունիում և Գավառում բնակվող վետերանները, հուլիսի 26-ին` Աշտարակում, Եղվարդում և Դիլիջանում, հուլիսի 30-ին` Ապարանում, Սպիտակում, Վանաձորում, օգոստոսի 6-ին` Եղեգնաձորում, իսկ 21-ին` Աբովյանի և Տավուշի տարածաշրջաններում բնակվող վետերանները:
Ընդհանուր առմամբ` Հայրենական մեծ պատերազմի տարիներին Բելառուսի ազատագրման համար մեդալով պարգևատրվել է ՀՀ քաղաքացի 84 վետերան: