Հանձնաժողովում բացասական եզրակացություն ստացած ԲՀԿ-ի օրինագիծն ընդգրկվեց ԱԺ նստաշրջանի օրակարգում

ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ: Հայաստանի Հանրապետության Ազգային ժողովի «Բարգավաճ Հայաստան» խմբակցության կողմից ներկայացված «ՀՀ հարկային օրենսգրքում լրացում կատարելու մասին» օրենքի նախագիծը հանձնաժողովի կողմից բացասական եզրակացությամբ ընդգրկվեց 7-րդ գումարման Ազգային ժողովի 2-րդ նստաշրջանի օրակարգում: «Արմենպրես»-ի փոխանցմամբ՝ մայիսի 7-ի քառօրյա հերթական նիստում նախագիծը ներկայացրեց ԱԺ փոխխոսնակ, «Բարգավաճ Հայաստան» խմբակցության պատգամավոր Վահե Էնֆիաջյանը:

Նախագծով առաջարկվում է տվյալ տարվա համար հարկերից ազատել այն գյուղացիներին, որոնց գյուղատնտեսական նշանակության հողերը, տնամերձ և այգեգործական հողամասերը, պտղատու այգիները առնվազն 50 տոկոսով կվնասվեն:

Առաջարկվում է Հայաստանի Հանրապետության 2016թ. հոկտեմբերի 4-ի Հարկային օրենսգրքի 230-րդ հոդվածի առաջին մասը լրացնել նոր՝ 17-րդ մասով: Այն գյուղատնտեսական նշանակության հողերը, տնամերձ և այգեգործական հողամասերը բնակլիմայական աղետների հետևանքով՝ կարկուտ, երաշտ, ցրտահարություն և այլն, մշակաբույսերի, պտղատու այգիների առնվազն 50% վնասվելու դեպքում տվյալ տարվա համար հարկերից ազատելու մասին է»,- ասաց Էնֆիաջյանը:

ԱԺ Տնտեսական հարցերի մշտական հանձնաժողովի նախագահ Բաբկեն Թունյանը նշեց, որ իրենց հանձնաժողովը օրինագծի վերաբերյալ բացասական եզրակացություն է տվել:

«Հանձնաժողովը բացասական եզրակացություն է տվել, քանի որ նախագիծը ոչ միայն չի լուծում նշված խնդիրները, այլև հարցեր է առաջացնում ու կարող է հանգեցնել բյուջեի միջոցների անարդյունավետ ծախսմանը: Բայց այս ամենը հաշվի առնելով, որպեսզի մարդկանց մոտ թյուր կարծիք չմնա, թե մենք չենք մտածում գյուղացիների խնդիրների մասին, առաջարկում եմ կողմ քվեարկել և հարցը ներառել նստաշրջանի օրակարգում»,- նշեց Թունյանը:

Հարցը 107 կողմ և 1 դեմ ձայների հարաբերակցությամբ ընդգրկվեց նստաշրջանի օրակարգում: