ՀՀ ոստիկանությունը դեռ վերջնական որոշում չի կայացրել պարեկային ծառայությունը Dodge Charger ավտոմեքենաներով զինելու մասին. Աշոտ Ահարոնյան
1 րոպեի ընթերցում
ԵՐԵՎԱՆ, 3 ՄԱՅԻՍԻ, ԱՐՄԵՆՊՐԵՍ: ՀՀ ոստիկանության պարեկային ծառայությունը Dodge Charger մակնիշի ավտոմեքենաներով զինելու վերջնական որոշում դեռ չի կայացվել: «Արմենպրես»-ի հետ զրույցում այս մասին հայտնեց ՀՀ ոստիկանության հասարակայնության հետ կապի և լրատվության վարչության պետ Աշոտ Ահարոնյանը:
«Դա դեռ մոդել է, որը փորձնական է, փորձարկման փուլում է: Դեռ վերջնական որոշում չի կայացվել; Երբ վերջնական որոշում լինի, անպայման կտեղեկացնենք»,- ասաց Ահարոնյանը:
ՀՀ ոստիկանապետին կից հասարակական խորհրդի «Ֆեյսբուք»-ի պաշտոնական էջում հրապարակվել են փորձնական փուլի ավտոմեքենայի լուսանկարները:
«ՀՀ ոստիկանության պետին կից հասարակական խորհրդի անդամները այսօր ծանոթացան և փորձարկեցին ոստիկանության ձևավորման փուլում գտնվող «պատռուլ ծառայության» համար նախատեսված մեքենաների նմուշներից մեկը։ Տպավորությունները շատ բարձր էին, սակայն դեռևս կան հարցեր և դիտարկվում են նաև այլ տարբերակներ»,- նշված է խորհրդի էջում: